“UEFA Hakimlər Komitəsinin "Napoli" - "Qarabağ" matçına Şimon Marçinyakın briqadasını təyin etməsi bu oyuna nə qədər böyük önəm verməsinin göstəricisi idi. Deməli, ağdamlılar Avropada özündən söz etdirməyi bacarıb. Son mundialın finalının baş hakiminin bu matçda söz sahibi olması oyunun heç də asan keçəcəyindən xəbər vermirdi. Gözlənilən kimi də oldu. Neapollular uzun müddət "Qarabağ"ın müqavimətini qıra bilmədi, yalnız Kevin Medina məcburiyyətdən meydanı tərk etdikdən sonra hesabı açdılar. Amma gəlin baxaq: hesabın açılmasında hakim amili rol oynadımı? Təəssüf ki, oynadı. Dünyanın aparıcı referiləri də imiclərinə ləkə gəlməsinin müqabilində "Qarabağ"a badalaq vurmağı daha üstün tuturlar. Liqa mərhələsində Bilbaodakı matçın ssenarisi Neapolda da təkrarlandı. Düzdü, ötən dəfə penaltimiz verilməmişdi. Bu dəfə isə olmayan penaltini qapımıza təyin etdilər. Əslində 54-cü dəqiqədə Marko Yankoviç qaydanı pozmuşdu. Lakin buna qədər cərimə meydançamıza daxil olarkən Di Lorentso onun üzünə zərbə vurmuşdu. Bunu da Marçinyak yaxşı görürdü. Lakin Yankoviçə qarşı ediləni görməzdən gəldi, onun etdiyini çox gözəl gördü və böyük həvəslə penalti təyin etdi, üstəlik oyunçumuza sarı vərəqə də göstərdi. Deməli, bir səhv (penalti) digər bir səhvin (sarı vərəqə) yaranmasına səbəb oldu. Hərçənd VAR Marçinyakı monitora dəvət etsəydi, uzun-uzadı baxmağa ehtiyac da yox idi. Cərimə zərbəsi əks tərəfə verilməliydi. Axı necə olur ki, digər matçlarda hakimlər bundan da mürəkkəb epizodları incələyib, yekunda düzgün qərar verirlər, "Qarabağ"a gələndə isə VAR susur? Deməli, Avropada “Qarabağ”a münasibətdə ikili standartlar davam edir. Bəzi hakimlər sanki fürsət gözləyirlər ki, "Qarabağ"ı hesabda geri salsınlar... Bu epizod istisna olmaqla, digər bütün məqamlarda verilən qərarlar yerində idi və mübahisə doğurmurdu. Lakin penalti ilə bağlı səhv qərar bunlara kölgə salır. 51-ci dəqiqədə Maktomineyin güclü zərbəsindən sonra top bir neçə metrlikdə dayanan Medinanın başına tuş gəldi, Kevin huşunu itirərək yıxıldı. Lakin Marçinyak oyunu dərhal saxlamır, hücumun bitməsini gözləyir. Təxminən 5 saniyə sonra "Qarabağ" topa sahib olur və bu məqamda oyunu saxlayır. "Napoli"nin hücumu daha bir neçə saniyə uzansaydı, referu fit verməyə məcbur olacaqdı. Çünki ortada insan həyatına təhlükə var. Belə epizodlarda FİFA oyunu mümkün qədər tez dayandırmağı tövsiyə edir. Təbii ki, Marçinyakın idarəçiliyini məqbul saymaq olmaz. Penalti epizodu olmasaydı, hakimliyi “yüksək səviyyəli” ifadəsiylə xarakterizə etmək olardı”.