İspan hakim "Lex" - "Qarabağ" matçını necə idarə etdi? - Ekspert rəyi
İyulun 5-də Çempionlar liqasının 1-ci təsnifat mərhələsi çərçivəsində keçirilən "Lex"- "Qarabağ" matçının baş hakimi ispaniyalı Xose Luis Munuera idi.
Ağdamlıların minimal hesabla məğlub olduğu görüşdə referinin və köməkçilərinin ədaləti necə qoruduğu maraqlıdı. Bu məsələyə “işıq salmaq” üçün təcrübəli hakim Tahir Süleymanovun fikrini öyrəndik:
“Bu mərhələnin ən güclü cütü Poznanda üz-üzə gəldi. UEFA prinsipiallığı nəzərə alaraq qarşılaşmanı təcrübəli ispaniyalı hakimlər briqadasına həvalə etmişdi. Referi ilk dəqiqələrdən komandalara göstərdi ki, ikili mübarizələr zamanı hər xırda fola reaksiya verməyəcək. Final fitinə qədər də bu idarəçilik üslubuna sadiq qalaraq sona kimi oynamağa şərait yaradırdı. Ərazi üstünlüyünə yiyələnən "Qarabağ" üçün belə hakimlik fəlsəfəsi daha məqbul idi. Azarkeşlərin, yerli futbolçuların psixoloji təzyiqi təcrübəli referiyə təsir etmirdi. İlk hissədə "Lex" nadir əks-hücumlara bel bağlayarkən, Almeyda çatdırmırdı və epizodların birində sarı vərəqə ilə cəzalandırıldı. Referi “üstünlük” prinsipinə çox yer verir, tempin aşağı düşməsinə imkan vermirdi. Futbolçularla şifahi ünsiyyət qurur, rəsmi xəbərdarlıqlara son anda əl atırdı. Eyni anda göstərdiyi ikili sarı vərəqələr isə meydanda kimin söz sahibi olmasının əyani göstəricisi idi. Hakim Zubiri cərimə meydançasındakı simulyasiyaya görə cəzalandıra bilərdi. La Liqa kimi böyük çempionatı idarə edən referi bu oyuna da böyük qarşılaşma kimi yanaşdı və özünün də idarəçilik böyüklüyünü qorudu. "Böyük liqalarda futbolçular belə hallara yol vermir" yanaşması ilə həm epizoda önəm vermədi, həm də Zubirə psixoloji dərs vermiş oldu. Ümumilikdə hakimlər briqadası heç də asan olmayan qarşılaşmanı yüksək səviyyədə idarə edərək mübahisələrin, müzakirələrin yaranmasına imkan vermədi. Onların belə obyektiv və prinsipial idarəçiliyi heç vaxt yerli komandaları qane etmir. Təəssüf ki, oyun ərzində tam üstün futbol sərgiləyən, ədalətli hakim idarəçiliyi ilə üzləşən "Qarabağ" ilk hissədə ani diqqətsizlikdən qapısında qol gördü. Cavab matçında görüşün mahiyyəti ilə yanaşı, hakim amili də böyük rol oynayacaq”.
ABDULLA İSMAYILOĞLU
Digər xəbərlər
