İngiltərə çempionatının 12-ci turunun son oyununda ''Mançester Yunayted'' doğma ''Old Trafford''da ''Everton''u qəbul etdi.

"Football-plus.az" xəbər verir ki, son 5 turda uduzmayan ''Yunayted'' favorit hesab olunurdu. Ancaq təcrübəli Devid Moyesin çalışdırdığı ''Everton'' proqnozları alt-üst etməyi bacardı. Hətta qonaqların uzun müddət azlıqda oynaması da manikunianların işinə yaramadı. Özü də ''Everton''un qırmızı vərəqəsi hələ uzun illər unudulmayacaq.

Belə ki, 13-cü dəqiqədə İdrissa Geye öz komanda yoldaşı Maykl Kinin üzünə sillə endirdiyi üçün hakim tərəfindən birbaşa qırmızı vərəqə aldı. Buna baxmayaraq mersisaydlılar azlıqda həm qol vurdular, həm də qapını toxunulmaz saxladılar. 29-cu dəqiqədə Dyusberi-Hollun vurduğu baxımlı qol oyunda yeganə oldu. Bu, premyer-liqa tarixində komanda yoldaşlarının oyunun gedişində dalaşdığı ilk hal deyil. Sonuncu dəfə 2008-ci ildə ''Stok Siti''nin heyətində Rikardo Fuller komanda yoldaşı Endi Qriffinin üzünə zərbə endirdiyi üçün qırmızı vərəqə almış, sonra da 3 oyunluq cəzalanmışdı.

''Everton''un minimal hesablı qələbəsi ilə ortaya bəzi maraqlı statistik faktlar çıxdı. Məsələn, ''Everton'' ''Old Trafford''da 12 ildən sonra ilk dəfə qalib gəldi. Ən maraqlısı odu ki, 2013-cü ildə ''Everton'' qələbə qazanarkən ''Yunayted''in başında Devid Moyes dayanmışdı! Moyes karyerasında ilk dəfə ''Old Trafford'' səfərində qələbəyə sevindi. Buna qədər onun çalışdırdığı klublar ''arzuların teatrı''nda keçirdikləri 17 oyundan 4 heç-heçə, 13 məğlubiyyətlə ayrılmışdılar.

Bundan başqa ''Yunayted'' ilk dəfə premyer-liqada evdə azlıqda qalan rəqibə məğlub oldu!

Buna qədər manikunianların evdəki çempionat matçında 46 dəfə rəqibləri azlıqda qalmış və komanda bu oyunlardan 36 qələbə, 10 heç-heçə ilə ayrılmışdı.