Türkiyədə klub prezidenti və 25 futbolçu danışılmış oyunda günahlandırılır!
Türkiyə futbolunda danışılmış oyunlarla bağlı növbəti qalmaqal yaşanıb. Daha doğrusu, əvvəlcədən razılaşdırılmış ssenariyə bənzəyən oyun 2024-cü ilin aprelin 28-də keçirilsə də, bu ''şouda'' əməyi olanlar yalnız indi Nizam-İntizam Komitəsinə sövq ediliblər.
"Football-plus.az"xəbər verir ki, söhbət qeyd olunan tarixdə 2-ci liqa, yəni 3-cü divizionun ağ qrupunda baş tutan ''Nazilli Bələdiyəspor'' - ''Ankaraspor'' oyunundan gedir.
Türkiyə Futbol Federasiyasının rəsmi ''yutub'' səhifəsindən canlı yayınlanan və qolsuz başa çatan oyunda qeyri-adi göstəricilər ortaya çıxmışdı. Meydan sahiblərinə liqada qalmaq üçün 1 xalın kifayət etdiyi oyunda komandalardan heç biri 90 dəqiqə ərzində qapıya zərbə endirməmiş və matçda cəmi 2 künc zərbəsi yerinə yetirilmişdi. Bundan başqa heç bir futbolçuya vərəqə göstərilmədiyi görüşdə meydan sahibləri cəmi 5, qonaqlar isə 10 dəfə qaydanı pozmuşdular. Təxminən 16 aydan sonra bu oyunda yaşananlar TFF-yə şübhəli gəldi və qurumun rəsmi açıqlamasında ''Nazilli Bələdiyəspor''un başqanı Şahin Kaya da daxil olmaqla klubun 25 futbolçusu, məşqçilər korpusunun 1 üzvü, eləcə də 2 masajçı bu oyuna pul qoyuluşunda günahlandırılaraq NİK-ə sövq edilib. Klubun və adı keçən şəxslərin günahı sübuta yetirilsə, onları 56 və 57-ci maddələrlə çox sərt cəzalar gözləyir.
Klub özü aşağı diviziona göndərilə, iştirakçılar isə ömürlük futboldan kənarlaşdırıla bilərlər. Amma ''Nazilli Bələdiyəspor''un prezidenti Şahin Kaya iddiaları qətiyyətlə rədd edib:
''Prokurorluğun sübut tapa bilmədiyi dosye az qala iki ildən sonra yenidən açıldı. Yəni prokurorluq bu matçda şübhəli bir duruma rast gəlməyibsə, deməli bunun yenidən gündəmə gətirilməsinin altında başqa məqsədlər var. ''Futbolda təmiz əllər'' əməliyyatına başlamaq istəyirlərsə, ölkənin bütün prokurorlarını bu işə dəvət edirəm. Nə varsa, ortaya çıxsın. Həmin oyuna rəsmi bukmeker kontorları pul qoyuluşu qəbul etməmişdi. Siyahıdan çıxarmışdılar. Belədə biz hara pul qoyuluşu edə bilərdik? Pulu xarici kontorlara qoymaqda ittiham olunmağımız gülməlidi. Kim oynayıb? Nə vaxt oynayıb? Ortada heç bir sübut yoxdu. Hesablarımız həmin gündən bu yana təqib edilirdi. Ortaya şübhəli heç nə çıxmadı. Üstəlik hakimlər briqadası və hakim inspektor da oyunda şübhəli heç nəyin olmadığını bildiriblər. Bütün bunların fonunda bu qədər vaxtdan sonra NİK-ə sövq edilməyimiz inanılmazdı. Oyun alıb-satan biz yox, ''Zonguldakspor'' idi. Onların həmin mövsümdə son 7-8 matçını araşdırın. Hamısını pulla almışdılar. Amma xeyri olmadı və bizdən 1 xal geri qalıb aşağı liqaya düşdülər. TFF başqanı İbrahim Hacıosmanoğlu ilə görüşəcəm. Bu məsələni sona qədər təqib edəcəyik. Klubun vəkilləri bütün lazımi prosesləri həyata keçirir. Bizim qorxumuz yoxdu və bu məsələdən alnıaçıq şəkildə çıxacağımıza əminəm''.
