Dünən Türkiyə çempionatının 2-ci turu çərçivəsində növbəti oyunlar keçirildi.

Günün və turun ən böyük sürprizi ''Nef Stadionu''nda qeydə alındı. İlk turda Antalya səfərində çətinliklə də olsa, qalib gələn ''Qalatasaray''ın ''Girəsunspor''la ev oyununda ciddi problem yaşayacağı gözlənilmirdi. Amma İstanbul nəhəngi 45 mindən çox fanatın gözü önündə nəinki qalib gələ bilmədi, hətta qola da həsrət qaldı. 77-ci dəqiqədə Əbdülkərim Bardakçının kobud səhvindən sonra topu ələ keçirən Sayns Musleranı da keçərək boş qapı önündə özünü itirmədi. Bu qol qonaqlara 3 xal qazandırdı. Beləcə Okan Burukun ''Qalatasaray''ın başında ilk rəsmi ev oyunu, eləcə də Torreyra və Mertens kimi yeni transferlərin debüt matçı uğursuzluqla yekunlaşmıs oldu. 2 turdan sonra ''Cim-Bom''un aktivində 3 xal var. Maraqlıdı ki, Girəsun təmsilçisi ötən mövsüm də güclü rəqibinə səfərdə ciddi zərbə vurmuşdu. 2021/22-nin 20-ci turunda, daha doğrusu bu ilin yanvarın 8-də ''Girəsunspor'' yenə ''Qalatasaray''ı İstanbulda 1:0 hesabı ilə yenmişdi. Məhz həmin məğlubiyyətdən sonra Fatih Terim istefaya göndərilmişdi.