Xəbər verdiyimiz kimi Türkiyə futbolunda pul qoyuluşu ilə bağlı qalmaqal yeni mərhələyə qədəm qoyub.

"Football-plus.az" xəbər verir ki, bu dəfə federasiya tərəfindən mərc oynamaqda günahlandırılan 1024 peşəkar futbolçunun adı açıqlanıb. İşin ən diqqətçəkən tərəfi bu futbolçular arasında İstanbul nəhənglərindən də bəzi isimlərin yer almasıdı. ''Beşiktaş''lı Nəcip Uysal ilə Ərsin Destanoğlu artıq ədliyyəyə gələrək özlərini müdafiə etmək üçün şikayət ediblər. Onlar başqa şəxslər tərəfindən adlarına mərc saytlarında hesab açıldığını iddia ediblər.

Federasiyanın açıqlamasına inansaq, ''Qalatasaray''dan isə Metehan Baltacı ilə Ərən Elmalı oyunlara pul qoyuluşu edib. Ərən həm də yığma üzvüdü! Onun adı ən son açıqlanan Türkiyə yığmasının heyətinə də salınmışdı. Ancaq bu qalmaqal üzündən federasiyanın intizam təlimatnaməsinin 57-ci maddəsinə əsasən onun adı yığmanın heyətindən çıxarılıb. Eləcə də İzzət Çəlik Türkiyənin U-21, Ege Albayrak isə U-19 yığmasından çıxarılıb.

Qeyd edək ki, ''Kasımpaşa''nın yetirməsi olan və peşəkar karyerasına bu klubda start verən Ərən Elmalının ulduzu ''Trabzonspor''da parlayıb. 25 yaşlı sol müdafiəçi ''Qalatasaray''ın şərəfini bu ilin yanvarından, yəni ötən mövsümün qış dönəmindən etibarən qoruyur. Qalmaqalın ardından Ərən öz səhifəsində paylaşım edib. O, mərc oyunlarında iştirak etdiyini etiraf edib. Amma bunu sonuncu dəfə təxminən 5 il öncə etdiyini vurğulayıb.

Elmalının sözlərinə görə, o, peşəkar futbolçunun pul qoyuluşu etməsinin rəsmi şəkildə qadağan olunduğunu bildikdən sonra bu işdən birdəfəlik çəkilibmiş. Təbii ki, onun sözlərinin doğru olub-olmadığı federasiyanın və prokurorluğun araşdırmasından sonra bilinəcək.

Onu da bildirək ki, Nizam-İntizam Komitəsinə sövq edilən futbolçuların 8-10-12 aylığa futboldan kənarlaşdırılacağı gözlənilir. Hər halda bir müddət öncə eyni maddə ilə günahlandırılan hakimlər məhz bu cür cəza almışdılar.