Bu mövsüm Misli premyer-liqasında azarkeş rekordu Sumqayıtda qırıldı. Belə ki, “Sumqayıt” - “Qarabağ” oyununu 9100 azarkeş stadionda izlədi. Buna qədər rekord 10-cu turun “Turan Tovuz” – “Şamaxı” oyununda (5800) qeydə alınmışdı.

Bəs 9100 rekordu da yenilənəcəkmi? Tovuzlular bacarmayacaq. Çünki stadionun tutumu buna imkan vermir. “Qarabağ” da həmçinin. Ümid qalır 21-ci turun fevralda keçiriləcək “Neftçi” – “Qarabağ” oyununa. 11 min yerlik tribunalar Azərbaycan derbisində dola bilər. Təbii ki, bakılılar həmin vaxta qədər iddiasını davam etdirsə.

Hə, bir də Gəncə stadionu var. “Kəpəz” bu mövsüm15464 yerlik stadionda oynaya bilsə, rekordın qırılması tam realdı. Amma bir problem var - Əsasnamə. PFL-in Əsasnaməsində yazılıb ki, bir klub mövsüm ərzində ev oyunlarını ikidən artıq stadionda keçirə bilməz…

MÜZƏFFƏR QULUZADƏ