Misli premyer-liqasında 1-ci tur arxada qaldı. Düzdü, turun “Sabah” – “Qarabağ” oyunu təxirə salındı. İlk turda azarkeşlərin futbol üçün nə qədər darıxdığını gördük.

Belə ki, beş oyunun heç birində tribunalarda mindən az tamaşaçı olmadı. Mehdi Hüseynzadə adına Sumqayıt şəhər stadionu 3300 azarkeşə “qucaq açdı”. Daha sonra “Neftçi Arena”da, yeni adı ilə desək, “Palms Sport Arena”da 2700 tamaşaçı kassalardan bilet alaraq, oyunu stadiondan izlədi.

Növbəti sırada Şamaxı şəhər stadionudu. Şamaxıda ardıcıl iki gün iki oyun keçirildi. “İmişli” – “Turan Tovuz” oyununu 1900 azarkeş izlədi. Düzdü, burda tovuzlular çoxluq təşkil edirdi. Şamaxıya Tovuzdan 9 avtobus gəlmişdi. “Karvan-Yevlax”ın nominal ev sahibi kimi keçirdiyi “Qəbələ” ilə oyuna isə 1500 azarkeş gəldi. Burda azarkeşlərin komandalar üzrə bölgüsü təxminən bərabər idi. Ən az azarkeş isə Zirədə idi – 1000 azarkeş. Əslində stadion tam dolsaydı, 256 nəfər də gəlsəydi, yenə sonuncu yerdə bu oyun olacaqdı.

Qeyri-müəyyən vaxta təxirə salınan “Sabah” – “Qarabağ” oyunu da keçirilsəydi, yəqin ki, turun rekordu Masazırda qeydə alınacaqdı.

MÜZƏFFƏR QULUZADƏ