Ölkə çempionatının 12-ci turu Yevlaxda start götürdü. 15 il sonra Yevlaxa elita oyunu gəldi. Lakin azarkeşlər gözlənilən ab-havanı hiss etdirə bilmədilər.

Həmin gün şəhərdə futbol ab-havasını hiss edə bilmədim. Fanklub olmadığına görə azarkeşlər də kefi istəyəndə komandanı dəstəkləyir, qalan vaxtda tum çırtlayırdılar. Klub rəhbərliyi stadiona girişin pulsuz olduğunu elan etmişdi, bununla belə, 6 minlik stadionun üçdəbiri boş qaldı. Niyə, nəyə görə? Bəs Yevlaxda futbol elə, Yevlaxda futbol belə? Hanı, harda qaldı?

Azarkeşlər kluba xeyir vermək əvəzinə ziyan vurdular. Hakimi 10 dəqiqə dayanmadan təhqir etdilər, meydana kənar əşya atdılar, sonda bir uşaq meydana çıxdı. Belə olmaz axı.

Yevlax ilə Gəncə yaxındı deyə, stadionda daha çox qonaq azarkeş gözləyirdik. Sayları az olsa da, çox fəal göründülər. Bir sözlə, Yevlaxa futbol qayıtsa da, bayram ab-havası olmadı.

MÜZƏFFƏR QULUZADƏ