''Fənərbaxça'' bir tərəfdən heyəti gücləndirirsə, digər tərəfdən klubdan sürpriz ayrılıq xəbərləri gəlir.

Belə ki, İrfan Can Kahvecinin İstanbul nəhəngindən ayrılmaq istəməsi ilə bağlı iddialar peyda olub.

Təcrübəli futbolçu 2023/24-də, yəni İsmayıl Kartalın dönəmində komandanın aparıcı üzvlərindən biri olmuş və karyerasının ən yaxşı mövsümünü keçirmişdi. Amma o, Joze Mourinyonun gəlişindən sonra əsas heyətdəki yerini itirdi.

İrfanın fikrincə, yeni mövsümdə də dəyişən bir şey olmayacaq. Portuqaliyalı məşqçi ona əsas heyət üzvü gözü ilə baxmır. Türkiyə yığmasının üzvü ən yaxşı halda ikinci hissələrdə şans qazanacaq. Bu üzdən İrfan menecerinə yeni klub tapmaq tapşırığı verib.

Daha bir maraqlı xəbər odu ki, ''Beşiktaş'' belə desək, pusquda dayanıb. ''Qartal'' İrfanın xidmətində çox maraqlıdı və ilk fürsətdəcə ''Fənər''ə rəsmi təklif irəli sürməyə hazırlaşır. Ancaq deyilənə görə 29 yaşlı futbolçu karyerasını Avropada davam etdirmək istəyir. O, menecerinə məhz Avropa klubları ilə danışıqlar aparmağı tapşırıb.

Türkiyə yığmasında indiyə qədər 41 oyun keçirmiş Kahveci ötən mövsüm ''sarı-lacivərdlilər''in heyətində cəmi 14-ü start heyətində olmaqla 42 rəsmi oyunda iştirak edib və aktivinə 3 qol, 4 məhsuldar ötürmə yazıb.

Qeyd edək ki, İrfan ''Fənər''lə bu ilin yanvarında 2028-ci ilə qədər yeni müqavilə imzalamışdı.