Nigeriya yığmasının heyətində yenidən zədələnən Viktor Osimhen İstanbula qayıdan kimi ''Qalatasaray'' tərəfindən klubun sponsorlarından biri olan ''Acıbadem'' xəstəxanasında tibbi müayinədən keçirilib.

"Football-plus.az" xəbər verir ki, klubdan ulduz futbolçunun son durumu ilə bağlı rəsmi açıqlama verilib.

Açıqlamada Osimhenin sol ayaq arxa əzələsində yüklənmə və qanama olduğu vurğulanılıb. Onun müalicə kursu artıq başlayıb. Türkiyə yığmasının düşərgəsində zədələnən Kaan Ayhan isə gün ərzində tibbi müayinədən keçiriləcək. İstanbul nəhənginin əsas qol silahı olan Osimhenin həftəsonu ''Gənclərbirliyi'' ilə matçı buraxacağı dəqiqdi.

Gələn həftə isə Türkiyə çempionunu iki mühüm oyun gözləyir. ''Cim-Bom'' əvvəlcə Çempionlar Liqasında ''Yunion''la, sonra da dekabrın 1-də ''Fənərbaxça'' ilə qarşılaşacaq. 26 yaşlı futbolçunun Belçika çempionuna qarşı oynaması böyük riskdi. Ona görə də onun həmin matçı buraxacağı gözlənilir. ''Fənər''lə derbidə isə Osimhenin adı ən azı iştirak ərizəsində olacaq. Amma neçə dəqiqə oynayacağı bəlli deyil.