Rəsmi matçlardakı 16 oyunluq qələbə seriyasını ''Ayntraxt''la qarşılaşmada da davam etdirərək Çempionlar Liqasına qələbə ilə başlamaq arzusunda olan ''Qalatasaray'' əsas qol silahından üzücü xəbər alıb.

Belə ki, İstanbul nəhəngi Frankfurta Viktor Osimhensiz yollanıb!

Xatırladaq ki, tanınmış forvard Nigeriya yığmasının heyətində sentyabrın 6-da Ruanda ilə qarşılaşmada zədə almış, daha sonra xüsusi təyyarə ilə İstanbula dönməli olmuşdu. Tibbi müayinə zamanı onun zədəsi çox qorxulu çıxmasa da, adətən bu cür durumlarda futbolçunun meydana qayıtması ən azı 2 həftə çəkir.

Ötən həftəsonu ''Eyüpspor''la oyunu buraxan Osimhenin ÇL-də komandaya yardım edəcəyi, hətta start heyətində meydana çıxacağı gözlənilirdi. Amma Osimhenin topuğunda ağrılar azalmayınca tibbi personalın qərarı ilə məşqçilər korpusu riskə getmək istəmədi və ulduz futbolçu səfərə aparılmadı.

Beləliklə, Türkiyə çempionu bu yay 75 milyon avroya transfer etdiyi futbolçunun xidmətindən ÇL-dəki birinci matçda yararlana bilməyəcək. Belədə bütün yük Mauro İkardinin üzərinə düşəcək. Argentinalı forvard özü də ağır zədədən yeni qayıdıb və hələ tam formada deyil. Bununla belə İkardi bu mövsüm superliqada yalnız 136 dəqiqə forma geyməsinə baxmayaraq artıq aktivinə 3 qol yazıb.

Onu da xatırladaq ki, ''Qalatasaray'' avrokuboklarda keçirdiyi son 9 səfər oyununun hamısında qələbəyə həsrət qalıb.