Osimhen yığmada zədələndi! - ''Qalatasaray'' onu tezliklə Türkiyəyə gətirmək istəyir
''Qalatasaray''ın bu yay böyük çətinliklə 75 milyon avro ödəyərək daimi əsasda heyətinə qatdığı və fanatların çox şey gözlədiyi Viktor Osimhendən üzücü xəbər gəlib.
Belə ki, İstanbul nəhənginin əsas qol silahı yığmanın heyətində zədələnib! Nigeriya dünən Afrika zonası üzrə seçmə mərhələdə C qrupunun 7-ci turu çərçivəsində doğma fanatları önündə Ruanda ilə qarşılaşıb. İlk yarının ortalarına ayağında ağrılar hiss etməyə başlayan Osimhen oyuna davam edə bilməyib və 35-ci dəqiqədə əvəzlənib!
Nigeriyalıların çalışdırıcısı Erik Şell oyundan sonra verdiyi açıqlamada Osimhenin durumuna bazar günü aydınlıq gələcəyini bildirib. Ruandanı minimal hesabla yenən və 7 oyuna 10 xal toplayaraq 3-cü pillədə qərarlaşan Nigeriyanı sentyabrın 9-da səfərdə qrup lideri Cənubi Afrikaya qarşı çox vacib oyun gözləyir. Təbii ki, ''Qalatasaray'' camiəsi də əl-ayağa düşüb. Çünki komandanı qarşıda çox vacib oyunlar gözləyir. Gələn həftə Çempionlar Liqasının əsas mərhələsi də start götürür.
Bu arada ''Cim-Bom''un baş məşqçisi Okan Buruk qatıldığı bir canlı yayında Osimhenin zədəsi ilə bağlı açıqlamalar verərək bunları deyib:
''Osimhenlə dərhal əlaqə saxladıq. Bizə ayağında ağrılar olduğunu dedi. Tam olaraq nə durumda olduğunu bilmirik. Yönəticimiz Abdulla Kavukçu onunla daim əlaqədədi. Mümkün olan ən qısa müddətdə onu bura gətirib tibbi müayinədən keçirmək istəyirik. Çünki ağrıları var və yığmasının qarşıdakı oyununda zatən iştirak edə bilməyəcək. Müayinədən sonra nə durumda olduğunu görəcəyik. Bizim üçün üzücü bir durum oldu. Ümid edirəm ki, ciddi bir şey yoxdu. Ən qorxduğum şey futbolçunun yığmanın oyununda zədə almasıdı. Təəssüf ki, bu dəfə bu hadisə bizim başımıza gəldi''.
