Osimhenin son durumu bəlli oldu - ''Qalatasaray''ı heç kim günahlandıra bilməz''
''Qalatasaray''ın əsas qol silahı Viktor Osimhenin yığmanın heyətində zədələndiyini xəbər vermişdik. Məşhur forvard Afrika zonası üzrə DÇ-2026-nın seçmə mərhələsi çərçivəsində Nigeriyanın Ruandaya qarşı ev oyununda artıq ilk yarıda zədələnərək əvəzlənmişdi.
''Qalatasaray'' sol ayağının topuğundan zədə alan forvardın Türkiyəyə gətirilməsi üçün xüsusi təyyarə göndərib. Osimhen artıq İstanbula gətirilərək təcili tibbi müayinədən keçirilib. Onun şənbə günü superliqanın 5-ci turu çərçivəsində ''Eyüpspor''a qarşı oyunu buraxacağı dəqiqdi. Amma Osimhenin gələn həftə Çempionlar Liqasında səfərdə Frankfurt ''Ayntraxt''ına qarşı baş tutacaq matçı da buraxmaq ehtimalı yüksəkdi.
Bu arada Nigeriya yığmasının bir rəsmisinin açıqlamaları diqqət çəkib. Nigeriya bu gün mübarizə apardığı C qrupunda lider Cənubi Afrikaya qarşı səfər matçı keçirəcək. Nigeriya lap Osimhen oynamasa belə, onun komanda ilə birlikdə səfərə yollanmasını istəyirdi. Amma ''Qalatasaray''ın onu təcili olaraq geri gətirməsi bu arzunun üzərindən xətt çəkib.
Türkiyə mətbuatının yazdığına inansaq, Nigeriya yığmasının adı açıqlanmayan bir rəsmisi məsələ ilə bağlı bunları deyib:
''Komandamızda hər kəs Osimhenin bizimlə birlikdə bu səfərə yollanmasını istəyirdi. Osimhenin qarşıdakı matçda oynamayacağı bəlli olduqdan bəri Cənubi Afrika yığmasında sanki bayramdı. Osimhenin bizimlə birlikdə olması rəqibə psixoloji təzyiq baxımından önəmli idi. Ancaq ''Qalatasaray'' rəsmiləri onun dərhal geri qayıtmasını istədilər. Bu qərarlarına görə onları heç kim günahlandıra bilməz. Hər halda bu yay Osimheni daimi transfer etmək üçün böyük pullar xərcləyiblər''.
Bu arada Osimhenin tibbi müayinəsindən sonra qorxulu bir şey çıxmayıb. Onun topuğunda qanama və şişmə aşkarlanıb. Forvard hələ ki, bir neçə məşqi buraxacaq. Amma Türkiyə mətbuatının yazdığına inansaq, 26 yaşlı futbolçu ÇL matçında komandaya yardım edə biləcək.
Digər xəbərlər
