DÇ-2026-nın seçmə mərhələsinin E qrupunda Türkiyə İspaniyanın qonağı oldu.

"Football-plus.az" xəbər verir ki, Sevilya şəhərində keçirilən matçda meydan sahibləri aşkar favorit sayılırdılar. Çünki bu seçmə mərhələnin bütün oyunlarında rəqiblərini darmadağın edən İspaniya xal itirməmək bir yana heç qol da buraxmamışdı.

Bu komandaların ilk oyununda Türkiyədə 6:0 qalib gələn ''buğalar'' bu matçda da 4-cü dəqiqədə Dani Olmo ilə hesabı açdılar. Həmin an düşünmək olardı ki, Türkiyə yenə darmadağından qurtula bilməyəcək. Amma heç də belə olmadı. Rəqib hücumlarını qarşısını kəsən və tədricən təzyiqi artıran qonaqlar 42-ci dəqiqədə Dəniz Gül ilə bərabərlik qolunu vurdular. Bununla da İspaniyanın qol buraxmamaq seriyası qırıldı. Özü də ''Portu''nun şərəfini qoruyan gənc forvard yığmada debüt qolunu vurdu!

İkinci hissənin əvvəllərində Salih Özcan hətta Türkiyəni önə də keçirdi. Amma sürpriz qələbəni qorumaq mümkün olmadı. Mikel Oyarsabal İspaniyanı məğlubiyyətdən xilas etdi və görüş 2:2 hesabı ilə yekunlaşdı. Düzdü, Türkiyənin bu rəqibə qarşı qələbəsiz seriyası 10 oyuna yüksəldi (4 heç-heçə, 6 məğlubiyyət). Amma İspaniyanın gücünü və hansı formada olduğunu, üstəlik Türkiyənin heç də əsas heyətlə oynamadığını nəzərə alsaq, bu nəticəni qardaş ölkənin komandasının aktivinə yazmaq olar. Özü də nəzərə alaq ki, Türkiyə İspaniyaya qarşı son 8 oyunda yalnız 1 qol vura bilmişdisə, bu dəfə 90 dəqiqəyə iki qol sığışdırdı.

Beləliklə, Türkiyə qrupunu ikinci pillədə tamamladı və mundiala qatılmaq üçün pley-offda iştirak edəcək. İspaniya isə birbaşa DÇ-2026-ya vəsiqə qazandı.