Məlum olduğu kimi, qarşıdan yığma həftəsi gəlir.

DÇ-2026-nın seçmə mərhələsi çərçivəsində önəmli oyunlar keçiriləcək. Türkiyə yığması da kənarda qalmayacaq. Qardaş ölkənin komandasını da iki mühüm qarşılaşma gözləyir. “Ay-ulduzlular” DÇ-2026-nın seçmə mərhələsi çərçivəsində sentyabrın 4-də Tbilisidə Gürcüstanın qonağı olacaq.

Bu komandalar sonuncu Avropa çempionatında da qarşılaşmış, Türkiyə 2:1 hesabıyla qalib gəlmişdi. Sentyabrın 7-də isə Türkiyə Konyada AÇ-nin son qalibi İspaniyanı qəbul edəcək.

Bu arada Türkiyə yığmasının baş məşqçisi Vinçentso Montella 28 nəfərlik geniş siyahı açıqlayıb. Budəfəki siyahıda sürpriz isim və ya debütant yoxdu. Yalnız “Portu”da varlığı ilə yoxluğu bilinməyən və demək olar, oynamaq şansı qazanmayan qürbətçi forvard Dəniz Gülün hələ də yığmaya çağrılması diqqəti çəkir.

Tam siyahını sizə təqdim edirik: qapıçılar – Mərt Günok (Beşiktaş), Uğurcan Çakır (Trabzonspor), Altay Bayındır (Mançester Yunayted), Berke Özər (Lill); müdafiəçilər – Əbdülkərim Bardakcı, Ərən Elmalı, Kaan Ayhan (hamısı “Qalatasaray”), Çağlar Söyüncü, Mərt Müldür, Yusuf Akçiçək (hamısı “Fənərbaxça”), Samet Akaydın (Çaykur Rizəspor), Merih Dəmiral (Əl-Əhli), Fərdi Kadıoğlu (Brayton), Zeki Çelik (Roma); yarımmüdafiəçilər – Kərəm Aktürkoğlu, İrfan Can Kahveci, İsmayıl Yüksək, Oğuz Aydın (hamısı “Fənərbaxça”), Orkun Kökçü, Dəmir Ege Tıknaz (hər ikisi “Beşiktaş”), Yunus Akgün (Qalatasaray), Arda Gülər (Real), Hakan Çalhanoğlu (İnter), Salih Özcan (Borussiya D), Can Uzun (Ayntraxt F); hücumçular – Barış Alpər Yılmaz (Qalatasaray), Kənan Yıldız (Yuventus), Dəniz Gül (Portu).