DÇ-2026-nın seçmə mərhələsi çərçivəsində növbəti oyunlar keçirilib. Türkiyə Bursada Bolqarıstanı qəbul edib.

"Football-plus.az" xəbər verir ki, ''ay-ulduzlular''a ikinci pilləni, yəni pley-offa vəsiqəni təmin etmək üçün motivasiyasız və iddiasız rəqiblə ev oyununda 1 xal qazanmaq kifayət idi. Ötən ay evdə Türkiyədən 6 top buraxan Bolqarıstan bu dəfə nisbətən daha yaxşı təsir bağışladı. Amma yenə də xal qazanmaq mümkün olmadı. Meydan sahibləri hər hissədə bir qol vuraraq inamlı qələbə qazandılar.

Qalibiyyətin əsasını 18-ci dəqiqədə Hakan Çalhanoğlu qoydu. O, əllə oyuna görə təyin olunan penaltini dəqiq yerinə yetirdi. Hakan yığmada penaltidən artıq 7-ci qolunu vurdu. O, Türkiyənin tarixində bu cür şəkildə ən çox qol vuran futbolçudu. Təcrübəli yarımmüdafiəçi ikinci qolda da aktiv iştirak etdi. Məhz onun 83-cü dəqiqədə cərimə zərbəsindən asması zamanı Atanas Çernı topu öz qapısına göndərdi. Çalhanoğlu həm də yığmada 103-cü oyununu keçirdi və bu göstəricidə 3-cü pillədə qərarlaşan Bülənt Korkmaza çatdı.

Bu qrupun digər oyununda lider İspaniya səfərdə Gürcüstanı 4:0 yenərək yenə qol buraxmadı.

Türkiyənin kağız üzərində liderlik şansı davam etsə də, bunu reallığa çevirmək mümkünsüzdü. Çünki qardaş ölkə son turda səfərdə İspaniyanı ən azı 7 top fərqi ilə məğlub etməlidi! Xatırladaq ki, Türkiyə evdə İspaniyaya 0:6 məğlub olmuşdu.