Tur “Gənclərbirliyi”nin “İstanbul BŞ” üzərində qələbəsi ilə start götürdü.

"Football-plus.az" xəbər verir ki, paytaxt təmsilçisi Volkan Dəmirəlin rəhbərliyi altında keçirdiyi ikinci oyunda ilk qələbəsini qazandı. Başakşəhərlilərin isə 2 oyunluq qələbə seriyası qırıldı.

Noyabrın 8-nə təsadüf edən oyunlar meydan sahibləri üçün çox uğursuz alındı. “Çaykur Rizəspor” Antepdə qələbə hesabını qoruya bilmədi. Ötən tur səfərdə “Qalatasaray”dan xal qoparan “Trabzonspor” “Alanyaspor”la ev matçında favorit statusunu doğrulda bilmədi. Onuaçunun mövsümdəki 8-ci qolu qələbə üçün yetərli olmadı. İkinci hissədə Yanis Yaci səhnəyə çıxaraq “Alanyaspor”u məğlubiyyətdən xilas etdi. Bu, əfsanəvi George Hacinin oğlunun superliqadakı ikinci qolu oldu. Bu xal itkisi Fatih Təkkənin komandasına ikinci pilləni əldən vermək bahasına başa gəldi.

“Kasımpaşa”da eniş davam edir. Şota Arveladzenin “kreslosu laxlamağa” başlayıb. Evdə “Göztəpə”yə uduzan İstanbul klubunun bütün turnirlərdə məğlubiyyət seriyası 3, qələbəsiz seriyası 6 oyuna yüksəldi. “Beşiktaş” “Fənərbaxça” ilə derbidəki üzücü məğlubiyyəti Antalya səfərində unutdurdu. Müxtəlif səbəblər üzündən Orkun Kökçü ilə və Rafa Silvanın oynamadığı, Sərgən Yalçının isə tribunadan izlədiyi qarşılaşmada “qartal” 3:1 hesablı inamlı qələbə qazandı. Son vaxtlar rəqib meydanlarında daha inamlı təsir bağışlayan İstanbul nəhənginin səfərdə məğlubiyyətsiz seriyası 5 oyuna yüksəldi (3 qələbə, 2 heç-heçə). Komandanın sonuncu dəfə belə seriyası 2020/21-də yenə də Sərgən Yalçının başçılığı altında olmuşdu.

Noyabrın 9-da keçirilən oyunlarda isə əksinə, meydan sahibləri tam üstün oldular. Çağdaş Atanın “Konyaspor”un başında ilk oyunu uğursuz alındı. Onun komandası debütant “Fatih Karagümrük”dən iki cavabsız top buraxmaqla həm xala, həm də qola həsrət qaldı. Bu mövsüm Türkiyəni Konfrans Liqasında gözəl təmsil edən “Samsunspor” evdə “Eyüpspor” üzərində çətin və vacib qələbə qazandı.

Bütün turnirləri nəzərə alsaq, məğlubiyyətsiz seriyanı 11 oyuna yüksəldən Samsun təmsilçisi 3-cü pillə ilə xal fərqini 2-yə endirdi. “Ayaks” üzərində parlaq qələbədən sonra Kocaeliyə yüksək əhval-ruhiyyədə yollanan “Qalatasaray” isə fanatlarına əsl şok yaşatdı. Son çempionun bu mövsüm superliqada ilk məğlubiyyətini debütantla oyunda yaşayacağını az adam proqnozlaşdırardı. Özü də nəzərə alaq ki, “sarı-qırmızılar” debütantlara qarşı son 10 matçın hamısından qələbə ilə ayrılmışdılar. Bu, klub tarixinin rekord seriyası idi! Amma görünür, Okan Buruk komandasını bu matça lazımi səviyyədə kökləyə bilmədi. İngiltərəli vinger Daniel Aceyin ilk yarının sonlarında “Qalatasaray” müdafiəsini tar-mar edərək vurduğu qol görüşdə yeganə oldu. Oyunun sonlarına yaxın Osimhen topu tora göndərsə də, VAR-ın bir neçə dəqiqə davam edən incələməsinin ardından ofsayd qeydə alındı.

Beləliklə, son çempionun superliqada 19 oyunluq məğlubiyyətsiz seriyası başa çatdı. Maraqlıdı ki, ilk 7 turda xal itirməyən “Qalatasaray” son 5 turda artıq 7 xal itirib! Bundan başqa, komanda Okan Burukun dönəmində ilk dəfə çempionatda ardıcıl iki qarşılaşmada qola həsrət qaldı.

Domeniko Tedeskonun təyinatından sonra yavaş-yavaş dirçəlməyə başlayan “Fənərbaxça” xal fərqini minimuma endirmək fürsətini əldən vermədi. Ötən mövsüm Kadıköydə 3:3 bərabərə qalmaqla “Fənər”ə çempionluq mübarizəsində sarsıdıcı zərbə vuran “Kayserispor” bu dəfə eyni qəhrəmanlığı təkrarlaya bilmədi. Düzdü, qonaqlar iki qol vurdular. Amma bu qollar xal qazanmaq üçün yetərli olmadı. Hesabı açan Asensio ardıcıl 4-cü turda ən azı 1 qolun vurulmasında yaxından iştirak etdi. “Fənər”in son qolunu vuran Kərəm Aktürkoğlunun da maraqlı bir göstəricisi var. Belə ki, Kərəm Türkiyə çempionatında artıq 69 oyuna çıxıb və bu müddətdə bu turnirdə ən çox (69) qolun vurulmasında yaxından iştirak edən yerli futbolçudu (40 qol, 29 məhsuldar ötürmə).

Onu da bildirək ki, Tedeskonun təyinatından bəri “Fənərbaxça” Türkiyə çempionatında həm ən çox qələbə (6) qazanan, həm də ən çox xal (21) toplayan komandadı.

12-ci tur
Kocaelispor – Qalatasaray 1:0
Acey, 45.
Qalatasaray: Uğurcan Çakır, Sinqo (Şallai, 41), Sançes (Kaan Ayhan, 90), Əbdülkərim Bardakcı, Yakobs (Ərən Elmalı, 64), Lemina, Torreyra (Sara, 64), Sane, Barış Alpər Yılmaz, İkardi, Osimhen.

Fənərbaxça – Kayserispor 4:2
Asensio, 38. Nene, 40; 50. Kərəm Aktürkoğlu, 63 – Onuqkha, 53; 74.
Fənərbaxça: Ederson, Semedo (Mərt Müldür, 68), Şkrinyar, Oostervolde, Ləvənt Mercan (Braun, 85), Fred, Alvares (Bartuğ Elmaz, 85), Nene (Şimanski, 61), Asensio, Kərəm Aktürkoğlu, Talişka (Ən-Nəsiri, 61).

Antalyaspor – Beşiktaş 1:3
Boli, 52 – Abraham, 2. Calo, 27. Jota Silva, 81.
Beşiktaş: Ərsin Destanoğlu, Gökhan Sazdağı, Paulista, Calo, Rıdvan Yılmaz, Ndidi, Salih Uçan (Kartal Yılmaz, 46), Cengiz Ündər (Raşitsa, 80), Çernı (Dəmir Ege Tıknaz, 89), Ture, Abraham (Jota Silva, 67).

Trabzonspor – Alanyaspor 1:1
Onuaçu, 15 – Haci, 73.
Trabzonspor: Onana, Pina, Baniya, Okay Yokuşlu, Mustafa Eskihellaç (Sikan, 76), Jabol Folkarelli, Ulai (Visça, 76), Zubkov, Felipe Auqusto (Arif Boşluk, 59), Olaiqbe (Muçi, 59), Onuaçu.

Samsunspor – Eyüpspor 1:0
Borevkoviç, 85.
Samsunspor: Okan Kocuk, Zəki Yavru, Şatka (Borevkoviç, 46), Van Drongelen, Tomasson, Makumbu, Əmrə Kılınc, Cəlil Yüksəl (Eyüp Aydın, 46), Holse (Mendeş, 88), Musaba (Muandilmaci, 73), Ndiaye (Yunus Əmrə Çift, 88).

Gənclərbirliyi – İstanbul BŞ 2:1
Kelven, 35. Nyanq, 53-p. – Şomurodov, 46.
İstanbul BŞ: Muhammed Şengezer, Onur Bulut, Opoku, Duarte, Ömər Əli Şahinər (Kemen, 87), Umut Günəş, Berat Özdəmir (Arit, 58), Yusuf Sarı (Dəniz Türüc, 77), Kreşpo (Zelke, 68), Da Kosta (Kaluşinski, 58), Şomurodov.

Kasımpaşa – Göztəpə 0:2
Juan Santos, 52; 55.

Qaziantep – Çaykur Rizəspor 2:2
Bayo, 2. Rodriges, 74 – Sou, 29. Rodriges, 59-öz qapısına.

Fatih Karagümrük – Konyaspor 2:0
Serjinyo, 32. Fofana, 45.

1. Qalatasaray 12 9 2 1 25-6 29
2. Fənərbaxça 12 8 4 0 25-10 28
3. Trabzonspor 12 7 4 1 18-8 25
4. Samsunspor 12 6 5 1 18-11 23
5. Göztəpə 12 6 4 2 15-6 22
6. Beşiktaş 12 6 2 4 21-16 20
7. Qaziantep 12 5 4 3 17-20 19
8. Alanyaspor 12 3 6 3 12-12 15
9. Konyaspor 12 4 2 6 18-20 14
10. Çaykur Rizəspor 12 3 5 4 14-16 14
11. Kocaelispor 12 4 2 6 11-15 14
12. İstanbul BŞ 12 3 4 5 13-12 13
13. Antalyaspor 12 4 1 7 13-23 13
14. Gənclərbirliyi 12 3 2 7 12-17 11
15. Kasımpaşa 12 2 4 6 11-17 10
16. Kayserispor 12 1 6 5 13-28 9
17. Eyüpspor 12 2 2 8 6-15 8
18. Fatih Karagümrük 12 2 1 9 12-23 7

Bombardirlər: Onuaçu (Trabzonspor), Şomurodov (İstanbul BŞ) – 8, Ən-Nəsiri (Fənərbaxça), İkardi (Qalatasaray), Umut Nayır (Konyaspor) – 6.

Növbəti turun oyunları noyabrın 22-24-ü aralığında keçiriləcək: Beşiktaş – Samsunspor, Alanyaspor – Kasımpaşa, Eyüpspor – Fatih Karagümrük, Kayserispor – Qaziantep, Göztəpə - Kocaelispor, Konyaspor – Antalyaspor, İstanbul BŞ – Trabzonspor, Çaykur Rizəspor - Fənərbaxça, Qalatasaray - Gənclərbirliyi.

Turun rəqəmi
41 – “Kocaelispor” nəinki turun, hətta mövsümün ən böyük sürprizlərindən birinə imza atdı. Özü də bu komanda evdə “Qalatasaray”ı nə az, nə çox – düz 41 ildən sonra ilk dəfə məğlub etdi. Kocaeli təmsilçisi “Cim-Bom”u fanatları önündə sonuncu dəfə 1984-ün dekabrında yenmiş və sonrakı 6 ev oyununun hamısında qələbəyə həsrət qalmışdı. İstanbul nəhəngi üzərində son qələbəsini isə “Kocaelispor” 2009-un fevralında İstanbulda əldə etmişdi (5:2).

Turun ulduzu
Nene Dorgeles (Fənərbaxça) – “Fənər” həftələr sonra “Qalatasaray”la xal fərqini 1-ə endirmək şansı yaxalamışdı və məhz belə vacib məqamda Nene səhnəyə çıxdı. Malili vinger Türkiyə karyerasında ilk qollarını vurdu. Buna qədər o yalnız 4-cü turda “Gənclərbirliyi” ilə səfər matçında qol sevinci yaşamış, amma sonradan həmin epizod avtoqol kimi qəbul edilmişdi.

Turun sitatı
Rəcəp Durul, “Kocaelispor”un baş məşqçisi: