Bolqarıstanı 2:0 məğlub edən və DÇ-2026-nın seçmə mərhələsində yer aldığı E qrupunda pley-offu təmin edən Türkiyə yığmasını qarşıda İspaniya ilə səfər matçı gözləyir.

"Football-plus.az" xəbər verir ki, bu seçmə mərhələdə qol buraxmayan və son 30 rəsmi oyunda uduzmayan İspaniya hazırda qorxunc formadadı.

Oyun noyabrın 18-də Sevilya şəhərində keçiriləcək. Türkiyə birinci pilləni tutmaq üçün güclü rəqibini 7 top fərqi ilə məğlub etməlidi ki, bu da möcüzəyə bərabərdi. Bu arada Türkiyənin İspaniyaya kapitan Hakan Çalhanoğlusuz yollanacağı məlum olub. Təcrübəli futbolçunun adı zədə üzündən yığmanın heyətindən çıxarılıb.

Əvəzində U-21 yığmasından əsas komandaya iki futbolçu - İsak Vural ilə Yusuf Akçiçək dəvət edilib. Federasiyanın rəsmi açıqlamasında Çalhanoğlunun sağ əlinin biləyindən zədə aldığı qeyd olunub. Amma əsil səbəb təbii ki, başqadı. ''İnter''in üzvü sarı vərəqə limitini doldurmaq üzrədi. O, İspaniya ilə oyunda sarı vərəqə alacağı təqdirdə pley-offun ilk görüşünü cəza üzündən buraxmalı olacaqdı. Bu üzdən məşqçilər korpusu riskə getmək istəməyib.

Bu arada İspaniya - Türkiyə matçının hakimi də bəlli olub. Oyunu almaniyalı Feliks Svayer idarə edəcək. Təcrübəli hakim ən son bu ilin martında ''ay-ulduzlular''ın oyununda fit sahibi olub. Həmin vaxt qardaş ölkə Millətlər Liqasının pley-offunun cavab matçında Macarıstanı 3:0 məğlub etmişdi. Amma yığma və klub səviyyəsində Türkiyə təmsilçiləri indiyə qədər bu hakimin idarə etdiyi 8 oyunun cəmi 2-də qalib gəlib (3 heç-heçə, 3 məğlubiyyət).