DÇ-2026-nın seçmə mərhələsində E qrupunda mübarizə aparan Türkiyə yığması üçün 3-cü tur uğurlu alındı.

"Football-plus.az" xəbər verir ki, səfərdə qrupun ən zəif bəndi kimi görünən Bolqarıstanla qarşılaşan qardaş ölkənin komandası rahat şəkildə aktivinə 3 xal yazdı. Arda Gülərin erkən qoluna meydan sahibləri tez cavab verdilər və tərəflər fasiləyə bərabərliklə yollandılar. Amma ikinci hissədə Türkiyə daha 5 qol vuraraq rəqibini 6:1 hesabı ilə parçaladı.

Dubl edən Kənan Yıldız 20 yaş 160 günlüyündə Türkiyə yığmasının tarixində səfər oyununda iki qol vuran ən gənc futbolçu oldu. Digər qolları Zəki Çəlik və İrfan Can Kahveci vurdusa, daha bir qol Popovun avtoqolu sayəsində vuruldu. Türkiyə DÇ-nin seçmə mərhələlərində son 20 ildə səfərdəki ən böyükhesablı qələbəsini qazandı. 2005-ci ildə ''ay-ulduzlular'' DÇ-2006-nın seçmə mərhələsində səfərdə Qazaxıstanı 6:0 hesabı ilə yenmişdilər.

Maraqlıdı ki, bu görüşə qədər Türkiyə tarixi boyu Bolqarıstana qarşı səfərdə keçirdiyi 10 oyunun hamısında qələbəyə həsrət qalmışdı (3 heç-heçə, 7 məğlubiyyət)!

Matçı iki məhsuldar ötürmə ilə tamamlayan Hakan Çalhanoğlunun yığma komandada 100 oyun həddinə çatan 6-cı futbolçu olduğunu da bildirək. O, bu göstəricidə Arda Turanı yaxaladı və indi yalnız Əmrə Belözoğlu (101), Bülənt Korkmaz (102), Hakan Şükür (112) və Rüştü Rəçbərdən (120) geri qalır. Qrupda 3-cü oyunda 2-ci qələbəsini qazanan Türkiyə xalını 6-ya yüksəltdi.

Bu tur Gürcüstanı məğlub edən İspaniya 9 xalla liderdi. Aktivində 3 xal olan və 3-cü pillədə qərarlaşan Gürcüstan oktyabrın 14-də Türkiyənin qonağı olacaq. Qrupda ikinci pillənin taleyi məhz bu oyunda həll olunacaq.