Türkiyə yığması fanatlarını növbəti inamlı qələbə ilə sevindirib.

"Football-plus.az" xəbər verir ki, qardaş ölkənin komandası DÇ-2026-nın seçmə mərhələsinin 4-cü oyununda evdə Gürcüstanla qarşılaşıb.

Kocaelidə baş tutan və ölkə prezidenti Rəcəp Tayyip Ərdoğanın da stadiondan izlədiyi görüşdə meydan sahibləri çox inamlı təsir bağışlayıblar. Türkiyə heç də zəif olmayan rəqiblə matçda hələ ilk yarıda 3 qol vuraraq intriqanı öldürüb. Fasilədən sonra tərəflər hərəyə bir dəfə fərqləniblər və Türkiyə yekunda 4:1 üstün olub.

Mərkəz müdafiəçisi Merih Dəmiralın iki qol vurması diqqət çəkib. ''Ay-ulduzlular''ın heyətində DÇ-nin seçmə mərhələsi çərçivəsindəki oyunda dubl etmiş sonuncu müdafiəçi 2001-ci ildə Alpay Özalan olmuşdu. Həmin vaxt o, Makdeoniyaya iki qol vurmuşdu. Türkiyənin digər qollarını Kənan Yıldız ilə Yunus Akgün vurdu. Türklər ötən oyunda səfərdə Bolqarıstanı 6:1 darmadağın etmişdilər. Bu komanda XXI əsrdə ilk dəfə DÇ-nin seçmə mərhələsində ardıcıl iki oyunda ən azı 4 qol vurmağı bacardı!

Sonuncu dəfə bu fakta 1997-nin avqust-sentyabrında rast gəlinmişdi. Həmin vaxt türklər Uelsi 6:4, San Marinonu 5:0 yenmişdilər. Qrupda 4-cü oyunda 3-cü qələbəsini qazanan Türkiyə xalını 9-a yüksəltdi. İspaniya 12 xalla liderdi.

Ən azı pley-offu təmin etmək üçün Türkiyəyə qalan 2 oyunda 1 xal toplamaq yetərli olacaq.