DÇ-2022-nin pley-offu çərçivəsində martın 24-də səfərdə Portuqaliya ilə qarşılaşacaq Türkiyə yığması dünən Portuda ilk məşqini keçirib.

''Ay-ulduzlular'' bu şəhərin 4-cü divizionda çıxış edən təmsilçisi ''Qondomar''ın ev oyunlarını keçirdiyi ''San Migel'' stadionunda məşq keçiblər. Yüngül ağrıları olan Merih Dəmiral ilə Sərdar Əziz yığmanın qaldığı oteldə fərdi məşq edib. Maraqlıdı ki, məşqin ardından bu il yüzillik yubileyini qeyd edən ''Qondomar''da prezident Alvaro Serkeyra Türkiyənin idman direktoru Həmit Altıntop ilə baş məşqçi Ştefan Kuntsa saat hədiyyə edib. Onlar da öz növbələrində klub prezidentinə yığmanın imzalı formasını hədiyyə ediblər.

Bu arada Portuqaliya yığması bir-birinin ardınca önəmli oyunçularını itirməkdə davam edir. Bilindiyi kimi komandanın aparıcı mərkəz müdafiəçisi Ruben Diaş zədə üzündən qarşıdakı oyunu buraxmalı olacaq. Dünən isə Portuqaliya daha bir aparıcı mərkəz müdafiəçisini - Pepeni itirib! Federasiyanın açıqlamasında Pepenin koronavirus testinin müsbət çıxması üzündən adının siyahıdan çıxarıldığı qeyd olunub. Pepenin əvəzinə yığmaya ''Lill''in üzvü Tyaqo Calo daxil edilib. Uzun illər ''Real''dakı çıxışı ilə tanıdığımız Pepe 39 yaşı olmasına rəğmən fiziki cəhətdən yaxşı durumda idi. Seçmə mərhələdə bir sıra matçlarda forma geyən Pepenin yoxluğunu ciddi itki saymaq olar. Portuqaliyanın iki aparıcı müdafiəçisini itirməsi Türkiyənin lehinə işləyə bilər. Bundan başqa dünən zədə üzündən Ruben Neveşin də adı siyahıdan çıxarılıb. Onu yerinə yığmaya ''Portu''nun 22 yaşlı yarımmüdafiəçisi Vitinya çağırılıb.