Domeniko Tedesko ilə yüksəlişə keçən ''Fənərbaxça'' qış transfer dönəmində heyətin gücləndirilməsi ilə bağlı planlar cızır.

"Football-plus.az" xəbər verir ki, İstanbul nəhəngi ilk növbədə bir mərkəz hücumçusu və bir mərkəz müdafiəçisi almağı planlaşdırır.

Əslində Tedesko hücumdan o qədər də narazı deyil. Ancaq iddialara inansaq, ''sarı-lacivərdlilər''in bir nömrəli hədəfi Robert Levandovskidi. Dünyaca ünlü forvardın meneceri ilə ilk təmas qurulub. ''Barselona''nın polşalı qoleador ilə müqaviləsi bu mövsümün sonunda başa çatacaq. Ancaq müqavilədə şərti birillik anlaşma da mövcuddu.

İki tərəfin razılığı olacağı halda həmin anlaşma qüvvəyə minəcək. Hələlik isə Levanın yanvardan etibarın istədiyi klubla danışıqlar aparmaq şansı olacaq. 37 yaşlı futbolçu bu mövsüm La Liqada 9 oyunda iştirak edərək 449 dəqiqəyə 7 qol vurub. Bu da orta hesabla hər 64 dəqiqəyə 1 qol deməkdi. ''Barsa'' rəhbərliyi onun satılması ilə bağlı hələ yekun qərar verməyib.

Bu arada ''Fənər'' ''Barsa''nın daha bir üzvünə - Andreas Kristensenə də göz qoyub. 29 yaşlı danimarkalı müdafiəçi Kataloniya nəhəngində daimi oyun praktikasına malik olmadığı üçün ayrılmaq istəyir. ''Fənər'' qışda rəsmi təklif irəli sürmək niyyətindədi. Kristensenin müqaviləsi mövsümün sonunda bitəcək. Bu üzdən ''Barsa'' onu qışda kiçik məbləğə satmağa razıdı.

2022-də ''Çelsi''dən alınan futbolçu bu mövsüm 10 oyunda forma geyib və bunların yalnız 3-də 90 dəqiqə meydanda olub.