Az qala hər transfer dönəmində ''Fənərbaxça''nın maraq dairəsinə düşən, amma vətəninə dönüşü heç cür baş tutmayan Merih Dəmirəl növbəti dəfə ''sarı-lacivərdlilər''in diqqət mərkəzinə düşüb.

"Football-plus.az" xəbər verir ki, Türkiyə futbolunun son dönəmlərdə yetişdirdiyi ən güclü müdafiəçilərdən olan Merih ''Fənər''in yetirməsi olsa da, əsas komandada oynamaq ona qismət olmayıb.

Türkiyə mətbuatında ortaya atılan iddialara görə İstanbul nəhənginin əsas hədəfi daha bir sabiq üzvü olan Kim Min Ce olsa da, ''Bavariya'' koreyalını əldən buraxmaq istəmir. Amma 2023-dən bu yana ''Əl-Əhli''nin şərəfini qoruyan Merih ''Fənər''ə dönməyə hazırdı. Özü də onun Səudiyyə Ərəbistanı klubu ilə müqaviləsi mövsümün sonunda başa çatır. Yəni yanvardan etibarən 27 yaşlı futbolçunun istədiyi klubla danışıqlar aparmaq hüququ olacaq.

Bir müddət öncə ''Əl-Əhli''nin Türkiyə yığmasının üzvündən razı qaldığı və ona yeni müqavilə təklif etməyə hazırlaşdığı barədə xəbərlər peyda olmuşdu. Amma bu mövzuda hələ ki, bir yenilik yoxdu.

''Fənərbaxça'' bu transferi artıq yanvarda başa çatdırmaq üçün əlindən gələni edəcək. Çox güman, bunun üçün ''Əl-Əhli''yə müəyyən məbləğ ödəmək lazım gələcək. Hazırda Merihin transfer dəyəri 13 milyon avro civarındadı.