“Qarabağ”ın rəhbərliyi “Çelsi” ilə heç-heçə edən komandanın üzvlərini mükafatlandırıb.

Əvvəlcədən futbolçulara yüksək mükafat vəd edən rəhbərlik sözünü artıqlamasıyla tutub. Qələbə halında futbolçulara 120 min, heç-heçə olacağı təqdirdə 65-70 min manat civarında mükafat vəd edən rəhbərlik oyundan razı qalıb və heç-heçə qələbəyə bərabər tutulub. Nəticədə heç-heçə üçün nəzərdə tutulan mükafat artırılıb. Beləliklə, futbolçular “Çelsi” ilə oyuna görə 80-90 min manat arası mükafat alacaq.

Qeyd edək ki, “Benfika” üzərində qələbə futbolçulara 100 min, “Kopenhagen” üzərində qələbə isə 70 min manat qazandırıb.

Yeri gəlmişkən, “Qarabağ” “Çelsi” ilə oyundakı heç-heçəyə görə 700 min avro qazanıb. Ağdam klubu bu mövsüm əsas mərhələdəki qazancını artıq 4,9 milyon avroya çatdırıb. “Qarabağ”ın cari futbol ili üçün turnirdən ümumi qazancı isə 23,52 milyon avrodur (46 milyon manat).

Çempionlar Liqasında əsas mərhələyə vəsiqə üçün 18 milyon 620 min, qələbəyə görə 2 milyon 100 min avro, heç-heçəyə görə isə 700 min avro ödəyir. Pley-off mərhələsində isə mükafatlar önəmli dərəcədə artır. 1/8 finaldan əvvəl pley-offda oynayan komandalar 1 milyon avro qazanacaq. 1/8 finala yüksələn klublar isə 11 milyon avro mükafat əldə edəcək.