''Spartak'' yenə məşqçi istefası ilə gündəmə gəlib. Rusiya futbolunun flaqmanı Deyan Stankoviç ilə qarşılıqlı şəkildə yollarını ayırıb.

"Football-plus.az" xəbər verir ki, ekstravaqant və çılğın xarakteri üzündən Rusiyada tez-tez müxtəlif qalmaqallarda iştirak edən, eləcə də cəzalar alan serbiyalı çalışdırıcı 2024-ün mayından ''Spartak''ın başında idi.

Daha öncə ''Srvena Zvezda'' ilə 5 titul qazanan, eləcə də ''Ferenstvaroş''u ölkə çempionu edən 47 yaşlı mütəxəssis ilyarımlıq Rusiya macərasını titulsuz tamamladı. Moskva nəhəngi onun dönəmində keçirdiyi 64 rəsmi oyundan 37 qələbə, 11 heç-heçə, 16 məğlubiyyətlə ayrılmış oldu.

Maraqlıdı ki, qələbə sayına görə Stankoviç ''Spartak'' tarixindəki məşqçilərin ilk ''10-luğ''una daxil olmağı bacarıb. Bu siyahıya Oleq Romantsev (325 qələbə) başçılıq edir. Əslində ''Spartak'' son iki rəsmi oyunda qalib gəlmişdi. Amma komanda premyer-liqada ilk dövrəni zirvədən 8 xal geridə olmaqla 6-cı pillədə tamamladı. Hətta debütant "Baltika'' ilk dövrəni ''Spartak''dan daha yaxşı göstəricilərlə bitirdi.

Bundan başqa ''Axmat'' üzərində qazanılan son səfər qələbəsinin ardından Stankoviç ona hakimlə bağlı sual ünvanlayan jurnalisti sərt sözlərlə acıladı və bu üzdən növbəti dəfə ciddi tənqid obyektinə çevrildi. İstefada bu məqam da az rol oynamadı.

Yeni təyinata qədər ''Spartak''da baş məşqçi səlahiyyətlərini Vadim Romanov icra edəcək. Maraqlıdı ki, ''ağ-qırmızılar''ın başına keçməyə namizədlər arasında Qurban Qurbanovun da adı var. Amma ''Qarabağ''ın baş məşqçisi ''Spartak''da işləmək istəmir. O, ''Qarabağ''ı yalnız İstanbul nəhənglərindən, yəni ''Qalatasaray'', ''Fənərbaxça'' və ''Beşiktaş''dan birinə görə tərk edə bilər. Bu xəbəri Rusiyanın ''Legalbet'' saytı paylaşıb.