SSRİ çempionatının oyunlarını canlı görənlər bu gün az qala bayram ab-havasına bürünüb.

“Football-plus.az” xəbər verir ki, saat 21.00-da Moskvada “Spartak”la “Neftçi” arasında yoldaşlıq oyunu start götürəcək.

Təbii ki, indi nə “Spartak” həminkidi, nə də “Neftçi”. “Spartak” Rusiya, “Neftçi” Azərbaycan futbolunun flaqmanı sayılsa da, o da sirr deyil ki, qonşu ölkədə illərdi “Zenit”, bizdə isə “Qarabağ” “at oynadır”. Hər nə isə, “Spartak”la “Neftçi”nin SSRİ çempionatındakı və kubokundakı oyunlarının statistikasını xatırlatmaq istəyirik. Komandalar SSRİ çempionatı çərçivəsində 51 oyunda qarşılaşıb. “Spartak” 27, “Neftçi” 11 oyunda qalib gəlib, daha 13 oyun heç-heçə bitib. Topların fərqi də moskvalıların xeyrinədi – 106-52. SSRİ kubokuna təsadüf edən 4 oyundan üçü “qırmızı-ağlar”ın, biri isə “ağ-qaralar”ın qələbəsiylə bitib. Topların fərqində “Spartak”ın 7-1-lik üstünlüyü var.

ORXAN