Həbibin atası “Spartak” azarkeşiymiş...
Rusiya futbolunun flaqmanı “Spartak” yüngül çəkidə sabiq UFC çempionu Həbib Nurməhəmmədova üzərində 29-0 yazılan futbolka bağışlayıb.
"Football-plus.az" xəbər verir ki, dağıstanlı döyüşçü moskvalıların 15-ci turda keçirdiyi “Rostov”la ev oyununu (2:1) izləyənlər arasında olub. Klubun yaydığı xəbərdə deyilir:
“Qırmızı-ağlar”ın 29-0 nömrəli formasını MMA döyüşlərində qələbə seriyasının şərəfinə Həbibə təqdim etdik. Onu doğma stadionumuzda görməyə həmişə şadıq”.
Həbib sosial şəbəkədə yazdığı statusda mərhum atası Abdulmanapın “Spartak”ın böyük azarkeşi olduğunu xatırladıb. Xatırladaq ki, Həbib peşəkar karyerasını 2020-nin payızında – 32 yaşında bitirib. O, keçirdiyi 29 döyüşün 19-da vaxtından əvvəl qələbə qazanıb, heç kimə uduzmayıb. 2018-in aprelində qazandığı çempion kəmərini üç dəfə uğurla müdafiə edib.
Digər xəbərlər
