Dünya futbol ailəsindən təcrid olunan Rusiyanın futbol yığması dünən növbəti yoldaşlıq oyununu keçirib.

Sankt-Peterburqda keçirilən Peru ilə oyunu 45536 tamaşaçı izləyib. Nə qədər qəribə olsa da, bu oyunu Azərbaycandan olan hakimlər briqadası idarə edib. Referi Kamal Umudluya yan xətdə Namiq Hüseynovla Vüsal Məmmədov yardım edib. Umudlu bu oyunda 4-ü meydan sahiblərinə, 3-ü qonaqlara olmaqla 7 sarı vərəqə göstərib. Və 1:1 bitən oyunda 18-ci dəqiqədə Aleksandr Qolovinin vurduğu qolu səhvən qeydə alıb.

Bəli, Qolovinin fərqləndiyi epizodda peruluların qapıçısı Pedro Qalyese uğursuz oynayıb. Ancaq buna qədər Qolovinə ötürmə verən Aleksey Mirançuk qaydanı pozmuşdu. İş ondadı ki, Qalyese topu qapıdan zərbə ilə oyuna daxil edərkən Mirançuk cərimə meydançasına daxil oldu və qapıçıya tərəf qaçdı, yəni təzyiq göstərməklə bir növ səhvə məcbur etdi. Halbuki oyun qaydalarına əsasən, top oyuna daxil edilənə qədər rəqib komandanın futbolçuları cərimə meydançası xaricində olmalıdı.

Beləliklə, FİFA hakimi FİFA və UEFA-nın beynəlxalq yarışlardan uzaqlaşdırdığı bir yığmanın oyununda fit çalması azmış kimi, ona “ayı xidməti” də göstərdi.

Sadəcə, yazıqlar olsun!

HUŞƏNG