O, bu ölkəyə gəlib-getmiş ən yaxın məşqçilərdən biridi. Amma 2008-14 aralığındakı versiyası.

Azərbaycan maşın bazarında Almaniya istehsalı olan bütün köhnə avtomobillər “Made in China” möhürü ilə ölkəyə gətirilən, başdan-ayağa elektronika olan nəqliyyat vasitələrinə uduzduğu kimi, Kaxaber Cumberoviç Sxadadzenin yeni, 2024-ün fevralında “Qəbələ”nin “sükanı arxasına” keçən versiyası da “Standart”ı və “İnter”i çalışdıran modelindən açıq-aşkar geri qalır.

Bilirəm, qırmızı-qara rənglərə könül verən, gürcü mütəxəssisə az qala İsa Məsih gözü ilə baxan azarkeşlər üçün acı, çox acı reallıqdı. Amma barışın və mövsümün sonundakı aqibətinizi gözləyin. Zatən, başqa yolunuz da yoxdu!

Sxadadzenin hər mətbuat konfransı artıq söz və bəhanə yığınından başqa hansısa dəyər daşımır. Gah futbolçularının elita səviyyəsində olmadığını deyir, gah azarkeşlə sözləşir, gah günahı Süleyman Damadayevdə görür. Özünü isə heç nəyə görə günahkar saymır. Onsuz da Azərbaycanda məşqçinin məğlubiyyətlərin və uğursuzluqların səbəbini öz səhvlərində axtarması heç vaxt trend olmayıb, bundan sonra da olmayacaq. Məsələn, Samir Abasov hələ də özünü nəinki ölkənin, hətta bəlkə Cənubi Qafqazın ən güclü məşqçisi sayır. Halbuki hər şey, daha dəqiqi, onun “sənət əsəri” olan “Neftçi” ortadadı.

Abasovla haqq-hesabım sonraya qalsın, Sxadadzedən danışırdım. Adam nəyə görəsə etiraf etmək istəmir ki, seleksiyam tam bir fiasko olub, 1-ci liqa ilə premyer-liqanın reallıqlarını düzgün dəyərləndirməmişəm, elitada bu səviyyədə rəqabət olacağını gözləmirdim, kəsəsi, “İnter”dən ayrıldığım dönəmdə - 2014-də donub qalmışam, halıma ağlayan lazımdı. Əvəzində onun açıqlamalarında lirik-melanxolik ovqat var: “mən heç kimdən zəif görünmək istəmirəm”, “nəyisə atıb-getmək asandı”, “söz vermişəmsə, tutacam” və s. və i.a. Sanki gürcü məşqçi uğursuz bir məhəbbət dastanı yaşayır, necə olur-olsun, o qızla vidalaşmaq istəmir, gec tez barış yolu tapacağına, ulduzlarının barışacağına inanır. Nə bilim, vallah!

Adam iddiaları ilə imkanlarını düzgün hesablamayanda məhz elə Sxadadzenin gününə düşür. Hər gün “oyun varsa, nəticə də olacaq” kimi yayğın və heç bir ciddi əsası olmayan tezisin arxasına sığınıb dayanır. Amma nə vaxta qədər, batono Kaxa? Məncə, artıq yeni bəhanələr düşünmək lazımdı!

HUŞƏNG