Kaxaber Sxadadzenin “Qəbələ”yə qəfil təyinatı inanılmaz ajiotajla müşayiət olundu.

Əlbəttə, proseslərin çox sürətlə cərəyan etməsi çoxlarında hər şeyin əvvəlcədən planlaşdırılması təəssüratı yaratdı. Guya “Qəbələ”nin daxilində Elmar Baxşıyevi istəyənlər var imiş, onu istefaya göndərmək üçün münbit zəmin və şərait hazırlayırmışlar. Təbii ki, belə deyil. Azərbaycan futbolunda nəticələrindən də daha çox kimliyi, şəxsiyyəti ilə hörmət qazanan Elmar bəy məhz nəticələrə görə hər gün istefaya doğru daha bir addım atırdı. Özü də istər klub rəhbərliyi, istərsə azarkeşlər səviyyəsində dözümün son həddinin olacağını bilirdi. “Kəpəz”lə qarşılaşma bu mənada 6 xallıq oyun idi. Həm də bu oyun Qəbələdə yox, Gəncədə keçirilsəydi, dərdyarı. Sənin üçün doğma olan stadionda, faktiki öz publikan önündə əsas rəqibə bu şəkildə uduzursansa, son kartı da avtomatik yerə atırsan. Bəli, Baxşıyevin başına gələnlər məşqçi istefaları ilə bağlı klassik ssanaridən o qədər kənara çıxmadı. Həmin ssenariləri Azərbaycan təcrübəsinə köçürsək, bu dəfə yalnız ...Qurban Qurbanov çatışmadı. Cari mövsümdə yaşanan əvvəlki üç istefanın hər birində “Qarabağ”ın baş məşqçisinin “əli olmuşdu”.

Sxadadzenin ölkəmizə gəlişinə bədbin yanaşanlar Elmar Baxşıyevlə müqayisədə daha az maaş alacağına da qıcıqlanır. Hələ yanında Georgi Çixradze də var. O Çixradze ki, vaxtilə “İnter”i “Atletik” önünə çıxarmışdı, Bilbao klubu ilə evdə heç-heçə etmişdi. Bəs Gürcüstanın müasir məşqçi nəslinin iki nümayəndəsini Azərbaycana çəkib gətirən nədi? Doğrudanmı, Kaxaber Sxadadze Baxşıyevdən az maaşa razılaşıb?

Tam təbii ki, belə varianta razılaşması mümkündü. Əvəzində başqa məsələ var axı. Çox güman, az maaş + komandanı elitada saxlamaq müqabilində yüksək məğləğdə bonus variantını razılaşdırıblar. Öz aramızdı, Sxadadzenin daim ambisiyalı, iddialı, hədəflər uğrunda mübarizə aparmağı sevən məşqçi imici olub. İndi də portretinə daha bir cizgi əlavə etmək istəyir. Futbol icitmaiyyətinə mesajı budu: gəldim, faktiki ümidsiz vəziyyətdə olan, əsas rəqibdən 8 xal geri düşən komandanı götürdüm və elitada saxladım. İndi də pulumu verin! Biranlıq özümüzü klubun prezidenti Fariz Nəcəfovun və ya gözəgörünməz rəhbərliyin yerinə qoyaq: hansı birimiz belə şərtə razılıq verməzdi?

Sxadadzenin personası, xarakteri ilə bağlı Azərbaycan publikasına bəlli olan, həmkarlarımızı qıcıqlandıran bəzi cəhətlər var ki, mən onların da fərqindəyəm. Gürcü mütəxəssisin peşəkarlıqla bağlı tələbləri bəzən milli mentallıqdan yuxarı qalxır, məşqlərdə, oyuna hazırlıq prosesində söyüşdən istifadə etməsi ilə bağlı bilgi var. Ancaq onun peşəkar keyfiyyətlərini, çalışmaq bacarığını müzakirəyə çıxarmaq, bu yöndə şübhəyə dalmaq əbəsdi.
Azərbaycan futboluna yetərincə yaxından bələd olan biri ilin-günün bu çağında ölkəmizdə çalışmağa razılıq veribsə, deməli, bildiyi nəsə var. Deməli, özündə “Qəbələ”ni elitada saxlamaq üçün potensial görür. Hətta bu mümkün olmasa da, çətin anda çiynini ağır yükünü vermək cəsarətinə görə Sxadadzeyə alqış düşür. İstənilən halda, onun Azərbaycan çempionatına rəng qatacağına əminəm.

HUŞƏNG