“Oyun baxımından komandadan razıyıq. Futboldan anlayışı olan adam oyuna baxanda məşqçi işini hiss edir. Bir var kor-təbii şəkildə oynayıb bu vəziyyətdə olasan, bir də var yaxşı oyunla. “Araz-Naxçıvan”la matçın 2-ci hissəsi istisna olmaqla, bütün oyunları yaxşı keçirmişik. “Qarabağ”la matçda da hücum planında zəif idik. O oyunda da 20-ci saniyədə qırmızı vərəqə almışdıq, yaxşı müdafiə olunduq. Komandanın mübarizəsindən razıyıq. Amma nəticə eynidi. Məşqçimizdən də razıyıq. Yeganə problem qələbə qazana bilməməyimizdi. Oyun var, nəticə yoxdu. Bəli, məşqçinin etiraf etdiyi kimi seleksiya işləri çox pis aparılıb. Yerli futbolçuların 90 faizi ötən mövsüm də komandada oynayanlar idi. Onlar komandanın özəyidi. Bu mövsüm komandaya qoşulan bir neçə legioner premyer-liqa səviyyəsində deyil. Futbolun içində səhvlər də olur, düzlər də. Ümid edirik ki, qış fasiləsindən sonra daha da güclənib qələbələri sıralaya bilərik. Çünki baxımlı oyun var, məşqçi işi var. Sxadadzenin azarkeşlərlə mübahisəsinə gəlincə, stadionda olan bir nəfər kimi deyirəm ki, azarkeş məşqçiyə pis heç nə deməmişdi. Sadəcə, 7 oyuna 4 xal toplayan komandanın baş məşqçisini istefaya səsləyirdi. Bu da normaldı. Futbolun yazılmayan qanunudu ki, nəticə yoxdusa, birinci günah məşqçidə axtarılır. Mən Kaxaber bəyə çox inanıram. Amma baş məşqçi düzgün hərəkət etmədi. Peşəkar məşqçi nəinki azarkeşin üstünə getməməli, heç cavab da qaytarmamalıydı. İnanıram ki, Kaxaber Sxadadze daha çox işləyərək komandanı bu vəziyyətdən çıxaracaq. Azarkeşlər də bir neçə futbolçunu çıxmaq şərti ilə komandaya və məşqçiyə inanır. Nəticələrin gələcəyinə də ümid edirik. Amma güclənməli olduğumuz mövqelər var. Xüsusən də hücum planında. Bir daha deyirəm, Sxadadzenin hərəkəti düzgün deyildi. Azarkeş isti evini qoyub gəlib stadiondan oyuna baxır, ona cavab qaytarılmamalıydı. Bu azarkeşlərin sayı 5 nəfər də ola bilər, 5 min də”.