“Qalatasaray”ın göz bəbəyi Viktor Osimhen vacib qollar vurmaqda davam edir.

"Football-plus.az" xəbər verir ki, ünlü nigeriyalı forvard “Göztəpə” və “Bude/Qlimt” ilə son iki oyunda 3 qol vuraraq qələbələrdə mühüm rol oynadı. Bununla da Osimhen İstanbul nəhəngində 50-ci rəsmi oyunda vurduğu qolların sayını 43-ə çatdırdı.

O hazırda orta hesabla hər oyuna 0,86 qol kimi mükəmməl bir göstəriciyə malikdi. Klubun tarixinə nəzər salsaq, hazırda bunun ən yaxşı ikinci göstərici olduğunu görərik. Osimhen bu performansla yalnız Tanju Çolakdan geri qalır. Türkiyə futbolunun əfsanəvi qolçularından olan, hətta “Qızıl buts” da qazanan Çolak “sarı-qırmızılar”ın heyətində meydana çıxdığı 150 rəsmi oyunda 137 qol vurub. O, hər oyuna orta hesabla 0,91 qol vurmaqla bu göstəricidə zirvədə qərarlaşıb. 3-cü pillədə isə “Qalatasaray”ın unudulmaz isimlərindən olan Mətin Oktay yer alıb. Oktay 144 oyunda 117 dəfə fərqlənib ki, bu da hər oyuna orta hesabla 0,81 qol deməkdi.

İlk “10-luq”da indiki heyətdə olan daha bir ulduz - Mauro İkardi də yer alıb. Argentinalı forvard 99 oyunda 67 qol vurub və orta hesabla 0,68 qol göstəricisi ilə 8-ci pillədə qərarlaşıb.
Yeri gəlmişkən, Osimhenlə bağlı yeni transfer iddiaları var. O, bu mövsüm sərgilədiyi oyunla yenidən Avropa nəhənglərinin diqqət mərkəzinə düşüb. Ona maraq göstərən klubların başında “Barselona” və PSJ gəlir. Hər iki klub mərkəz hücumçusu ilə bağlı problem yaşayır. Bu üzdən onların 26 yaşlı futbolçuya maraq göstərməsi təəccüb doğurmamalıdı. Amma bu məsələdə əsas söz sahibi, təbii ki, “Qalatasaray”dı.

Yayda 75 milyon avro ödəyərək Osimheni daimi əsasda transfer edən “Cim-Bom” iddialara görə bu futbolçu üçün 140 (!) milyon avrodan aşağı olan heç bir təklifi dəyərləndirməyəcək. Osimhenin Türkiyə çempionu ilə 2029-cu ilə qədər müqaviləsi var.