Mövsümə inamlı start verən ''Qalatasaray'' fanatlarını sevindirməkdə davam edir.

"Football-plus.az" xəbər verir ki, Türkiyə çempionu Çempionlar Liqasında liqa mərhələsinin 3-cü turu çərçivəsində doğma meydanda Norveç təmsilçisi ''Bude/Qlimt''i 3:1 məğlub etdi.

''Cim-Bom''un ulduzu Viktor Osimhen iki qol və istəkli oyunu ilə matça damğa vurdu. Digər qolu isə aktivinə Yunus Akgün yazdı. Okan Burukun komandası 3-cü oyunda 2-ci qələbəsini qazanmaqla xalını 6-ya yüksəltdi və turnir cədvəlində vəziyyətini bir xeyli yaxşılaşdırdı. Matçın ən yaxşı oyunçusu seçilən Osimhen bir sıra önəmli göstəricilərə nail oldu. Nigeriyalı forvard avrokuboklarda meydana çıxdığı ardıcıl 7-ci oyunda qol vurdu və ''Qalatasaray'' tarixində bunu bacaran ilk futbolçu oldu!

Bu mövsümə qədər bu rekord Burak Yılmaza məxsus idi. O, 2012-ci ildə ardıcıl 6 avrokubok matçında fərqlənmişdi. Osimhenin daha bir uğuru qol dəqiqəsi ilə bağlıdı. O, 3-cü dəqiqədə fərqlənməklə ''Qalatasaray''ın ÇL-də vurduğu ən erkən qolun müəllifi oldu. Əvvəlki rekord 2013-cü ildə ''Kopenhagen''ə 9-cu dəqiqədə qol vuran Felipe Meloya məxsus idi. 26 yaşlı futbolçu həm də ''sarı-qırmızılar''ın heyətində 9-cu avrokubok matçında vurduğu qolların sayını 9-a yüksəltdi. O, indiki komanda yoldaşı Mauro İkardini (8) geridə qoyaraq klub tarixində avrokuboklarda ən çox qol vuran əcnəbi futbolçular arasında 6-cı pilləyə yüksəldi. Bu siyahıya 12 qolla Milan Baroş və Şabani Nonda başçılıq edir. Bu gedişlə Osimhenin bu rekordu artıq bu mövsüm yeniləməsi sürpriz olmayacaq.

Onu da bildirək ki, Osimhen ümumilikdə Türkiyə karyerasında 49-cu oyunda vurduğu qolların sayını 42-yə çatdırdı. Cəmi 13 aydı, klubda olmasına baxmayaraq o artıq ''Qalatasaray'' tarixinin ən məhsuldar oyunçuları siyahısında ilk ''20-lik''dədi! Maraqlıdı ki, Osimhen daha bir qol vuracağı təqdirdə klubun indiki baş məşqçisi Okan Buruku (43) yaxalayacaq.