“Real” “Barselona”dan bir qədər də uzaqlaşdı - İCMAL
Turda “el klasiko” varsa, başqa oyunlar istər-istəməz bir qədər gözdən düşür, diqqətdən kənarda qalır. Bəli, “Real” “Barselona”nı evdə məğlub etməklə onunla xal fərqini 5-ə çatdırdı. Turun hadisələrindən biri kimi “Selta”nın mövsümdə ilk qələbəsini qazanmasını da vurğulaya bilərik.
"Football-plus.az" xəbər verir ki, “Real” – “Barselona” duelləri ətrafında onsuz da həmişə müəyyən gərginlik olur. Sadəcə, bu dəfə Yamal yaşına uyğun olmayan və yersiz açıqlamalar ilə gərginliyi bir qədər də artırmış, sanki alovun üzərinə benzin tökmüşdü. Məntiqlə gənc istedad dediklərini meydandakı oyunu ilə tamamlamalı, oyunun qəhrəmanlarından biri olmalıydı. Ancaq...
Hər halda, hər iki komanda meydana qələbə üçün çıxdığını göstərdi. “Barsa” əsas oyunçularından Levandovski ilə Rafinyanın köməyindən məhrum idi. İlk yarıda “Real” daha üstün idi. Daha aqressiv və inadkar görünür madridlilər oyun başlayan kimi penalti qazandı, ancaq hakim VAR monitoruna baxandan sonra qərarını dəyişdi. Fasiləyə qədər top 4 dəfə “Barsa”nın qapısından keçdi. Bunlardan yalnız ikisi qaydalar çərçivəsində vurulduğuna görə sayıldı. Kataloniyalılar hətta rəqibin aşkar təzyiqi fonunda da qollardan birinin əvəzini çıxa bildi. İlk yarının axarı 2-ci hissədə də yüksək məhsuldarlıq görəcəyimizə inam yaratmışdı. Ancaq oyunun strukturu dəyişdi. “Real” daha çox hesaba oynamağa başladı. Belədə təşəbbüsü ələ keçirən “Barsa”, sadəcə, Kurtuanın qapısı önündə təhlükəli vəziyyətlər yarada bilmirdi. Madridlilər təzyiqin öhdəsindən gəlir, vaxtaşırı rəqib qapısı önündə görünürdülər.
2-ci hissənin əvvəlində hətta fərq arta bilərdi. Ancaq Şensnı Mbappenin penaltisini dəf etməyi bacardı. Bir də cərimə meydançasında nəzarətsiz qalan Kundenin fərqlənmək, hesabı bərabərləşdirmək imkanı var idi. Sadəcə, müdafiəçi instinkti qalib gəldi, topu özündən bir qədər irəli buraxdı ki, belədə Kurtua ona sahib çıxdı. Yamalın oyunöncəsi qalmaqallı açıqlamaları fonunda hakimin final fitindən sonrakı dava-dalaş gözlənilməz olmadı. Sarı və qırmızı vərəqələr “göydə uçuşdu”.
Səfərdə “Valensiya”nı məğlub edən “Vilyarreal” 2-ci pillədəki “Barselona” ilə xal fərqini 2-yə endirdi. Mövsümə yaxşı başlayan “Espanyol” “Elçe” üzərindəki qələbə sayəsində xalını 18-ə çatdırdı.
“Qarabağ”la oyunda hədsiz güc və enerji sərf edən “Atletik” növbəti xal itkisi ilə üzləşdi. Basklar evdə “Xetafe”yə uduzdu. “Rayo Valyekano” uzatma dəqiqələrində vurduğu qolla “Alaves”ə qalib gəldi. “Selta”, nəhayət, cari mövsümdə ilk qələbəsini qazandı. Düran 88-ci dəqiqədə vurduğu qolla qalisiyalıları sevindirdi.
Autsayderlərin – “Jirona” ilə “Ovyedo”nun dueli maraqlı ssenari üzrə cərəyan etdi. 0:2 geri düşən kataloniyalılar 90-cı dəqiqədə penalti qolu ilə artıq 3:2 önə çıxdı, bununla belə, “Ovyedo” 7-ci uzatma dəqiqəsində hesabı bərabərləşdirə bildi. “Malyorka” – “Levante” oyununda da heç-heçə qeydə alındı.
“Real Sosyedad” mövsümdəki 2-ci qələbəsini “Sevilya” üzərində qazandı. Bu oyunun taleyini Oyarsabalın dublu həll etdi. Turun dünən axşam keçirilən son oyununda “Atletiko” “Betis”ə qalib gəldi.
10-cu tur
Real – Barselona 2:1 (2:1)
Real: Kurtua, Valverde (Karvaxal, 72), Militao, Höysen, Karreras, Çuameni, Kamavinqa, Gülər (Dias, 66), Vinisius (Rodriqo, 72), Bellingem (Q.Qarsiya, 90), Mbappe (Sebalyos, 90+1).
Barselona: Şensnı, Balde (Martin, 90+7), E.Qarsiya (Arauxo, 74), Kubarsi (Bardaqji, 84), Kunde, De Yonq, Pedri, Lopes, Yamal, Reşford, Torres (Kasado, 74).
Qollar: Mbappe, 22 (1:0). Lopes, 38 (1:1). Bellingem, 43 (2:1).
Mbappe 52-ci dəqiqədə penaltidən yararlana bilməyib (qapıçı).
Vərəqələr: Valverde, 23. Pedri, 42. Höysen, 57. Lopes, 90+9. Vinisius, 90+11. Rodriqo, 90+11. Torres, 90+11. Balde, 90+11. Militao, 90+11 – sarı. Pedri, 90+10 – qırmızı (ikinci sarı). Lunin, 90+11 (meydandan kənarda) - qırmızı.
Hakim: Sesar Soto Qrado.
26 oktyabr. Madrid. 78107 tamaşaçı.
Real Sosyedad – Sevilya 2:1
Oyarsabal, 19-p.; 36 – Qudel, 30. (30965)
Jirona – Ovyedo 3:3
Stuani, 64-p.; 90-p. Unai, 83 – Vinyas, 38-p. Rondon, 57. Karmu, 90+7. (11120)
Espanyol – Elçe 1:0
Romero, 47. (30820)
Atletik – Xetafe 0:1
Mayoral, 75. (47749)
Valensiya – Vilyarreal 0:2
Moreno, 45-p. Komesanya, 57. (45560)
Malyorka – Levante 1:1
Maffeo, 79 – Eyonq, 22. (12964)
Osasuna – Selta 2:3
Budimir, 37-p.; 45+1 – Cutqla, 26; 69. Düran, 88. (20065)
Rayo Valyekano – Alaves 1:0
Alemao, 90+1. (11734)
Betis – Atletiko 0:2
Simeone, 3. Baena, 45+1. (57537)
1. Real 10 9 0 1 22-10 27
2. Barselona 10 7 1 2 25-12 22
3. Vilyarreal 10 6 2 2 18-10 20
4. Atletiko 10 5 4 1 18-10 19
5. Espanyol 10 5 3 2 14-11 18
6. Betis 10 4 4 2 15-12 16
7. Rayo Valyekano 10 4 2 4 12-10 14
8. Elçe 10 3 5 2 11-10 14
9. Atletik 10 4 2 4 9-10 14
10. Xetafe 10 4 2 4 10-12 14
11. Sevilya 10 4 1 5 17-16 13
12. Alaves 10 3 3 4 9-9 12
13. Selta 10 1 7 2 11-13 10
14. Osasuna 10 3 1 6 9-12 10
15. Levante 10 2 3 5 14-18 9
16. Malyorka 10 2 3 5 11-15 9
17. Real Sosyedad 10 2 3 5 10-14 9
18. Valensiya 10 2 3 5 10-16 9
19. Ovyedo 10 2 1 7 7-19 7
20. Jirona 10 1 4 5 9-22 7
Bombardirlər: Mbappe (Real) - 11, Alvares (Atletiko), Eyonq (Levante) – 6, Vinisius (Real), Muriqi (Malyorka) – 5.
Növbəti turun oyunları oktyabrın 31-i – noyabrın 3-ü aralığında keçiriləcək: Xetafe – Jirona, Vilyarreal – Rayo Valyekano, Atletiko – Sevilya, Real Sosyedad – Atletik, Real – Valensiya, Levante – Selta, Alaves – Espanyol, Barselona – Elçe, Betis – Malyorka, Ovyedo – Osasuna.
Turun rəqəmi
12 – Mbappe müxtəlif komandaların heyətində “Barselona”nın qapısından keçirdiyi qolların sayını bu həddə çatdırdı. Fransalı ulduz kataloniyalılara qarşı 9 dəfə oynayıb, qollardan 6-nı PSJ-nin, 6-nı “Real”ın oyunçusu kimi vurub. 21-ci əsrdə yalnız iki futbolçu “Barsa”nı bundan da çox cəzalandırıb: Kriştiano Ronaldo (34 oyunda 20 qol) və Kərim Benzema (46 oyunda 16 qol).
Turun ulduzu
Cud Bellingem (Real) – ingiltərəli komandasının qələbəsi üçün əlindən gələni etdi. Onun hesabında qol və məhsuldar ötürmə var. Hər iki halda da ustalığını və qol duyumunu aşkar şəkildə göstərdi.
Turun sitatı
Arsen Venger, “Arsenal”ın sabiq baş məşqçisi:
“Bu oyun bəzi aspektlərdə kişilərin oğlanlara qarşı mübarizəsi kimi göründü. Məsələn, “Real” müdafiədə “Barselona”dan çox yaxşı oynadı. “Barselona” Levandovski ilə Rafinyanın yoxluğunda “dişsiz” görünürdü. “Real”ın balanslaşdırılmış oyununa görə Xabi Alonsoya təşəkkür düşür. “Barsa”nın Mbappeyə qarşı oynayan müdafiə xəttində təcrübə və yetkinlik çatışmadı”.
Faktlar
* Mbappe Kriştiano Ronaldo ilə Ronaldinyonun “el klasiko”dakı göstəricisini təkrarladı. Kilian ardıcıl 4-cü belə oyunda “Barsa”nın qapısına yol tapdı. Fransalı “el klasiko” tarixinə ardıcıl 4 oyunda fərqlənən 3-cü futbolçu kimi düşdü. Əvvəllər bunu yalnız Ronaldinyo (2004-06-cı illərdə “Real”ın qapısına 4 oyunda 5 qol) və K.Ronaldo (2012-ci ildə “Barsa”nın qapısına 6 oyunda 7 qol) bacarmışdı.
* Mbappe ardıcıl 7 dəqiq penaltidən sonra 8-ci zərbədə büdrədi. O, sonuncu dəfə bu ilin mayında “Real Sosyedad”la oyunda penaltini qola çevirə bilməmiş, ancaq qapıçının seyvindən sonra təkrar zərbə ilə topu qapıdan keçirmişdi.
* “Real” son 5 oyunda ilk dəfə “Barsa”nı məğlub etdi. Ötən il keçirilən 4 oyunun hamısında “Barsa” qələbə qazanmışdı. La Liqada 4:0 və 4:3, İspaniya Superkubokunun finalında 5:2 və ölkə kubokunun finalında 3:2 hesabıyla.
* “Real” qələbə sayında “Barsa”nın ona çatmasına imkan vermədi. Əbədi rəqiblər indiyə qədər müxtəlif turnirlər çərçivəsində 262 dəfə qarşılaşıb. Bunların 106-da “Real”, 104-də “Barsa” qələbə qazanıb, qalan 52 oyun heç-heçə bitib.
Oyundan sonra
Xabi Alonso, “Real”ın baş məşqçisi:
“Qələbədən, oyundan, meydanda gördüyümüz işin həcmindən razıyam. Komanda və azarkeşlər üçün çox vacib qələbə idi. “Santyaqo Bernabeu”nun meydanda başverənlərdən necə təsirləndiyini gördüm. Bu qələbinin 3 xalla yanaşı, başqa önəmli cəhətləri də var. Topsuz qalanda çox yaxşı, vahid orqanizm kimi oynadıq, topla olanda isə rəqibi necə çətinliyə salacağımızı bilirdik. Bu komanda vacib oyunlarda qələbə qazanmaq bacarığını göstərdi”.
Markus Zorq, “Barselona”nın məşqçisi (Hans-Diter Flik cəzalı idi – red.):
“Düşünürəm ki, həmişəkindən çox səhvə yol verdik. Bu doğrudu ki, çox dərindən müdafiə olunduq. Meydanın rəqibə aid hissəsində yetərincə təhlükəli ola bilmədik. Nəticə ədalətlidimi? Bütün variantları sınadıq. Sonda hətta iki müdafiəçi ilə oynadıq, baxmayaraq ki, “Real”ın əks-hücumlarda təhlükəli olduğunu bilirdik. İkinci qolu vurmaq üçün lazımi qol vəziyyətləri əldə edə bilmədik”.
Digər xəbərlər
