La Liqanın 34-cü turunda ''Real'' ''Selta''nı qəbul etdi.

''Football-plus.az'' xəbər verir ki, ''Barselona''nın təqibini davam etdirən ''kral klubu'' çətin və mühüm qələbə qazandı. Start heyətində meydana çıxan Arda Gülər oyunun qəhrəmanlarından biri oldu.

Son matçlarda inamlı təsir bağışlayan Türkiyə yığmasının gənc ulduzu 33-cü dəqiqədə çox baxımlı bir qol vuraraq qələbənin əsasını qoydu. Arda bununla da ardıcıl 3-cü rəsmi oyunda məhsuldar hərəkətlə fərqlənmiş oldu! Qoldan ruhlanan ''Real'' ilk yarının sonlarında və ikinci hissənin əvvəllərində Mbappenin qolları sayəsində hesabı darmadağın həddinə çatdırdı. 3-cü qolda Arda aktivinə məhsuldar ötürmə də yazdı. 83 dəqiqə meydanda qalan 20 yaşlı futbolçu oyunu qol və məhsuldar ötürmə ilə tamamladı. Arda bu mövsüm 38-ci rəsmi oyununu keçirdi. O, 5 qol, 8 məhsuldar ötürmə ilə 13 qolun vurulmasında yaxından iştirak edib.

Arda ötən mövsüm də evdə ''Selta'' ilə oyunda fərqlənməyi bacarmışdı. Bir müddət öncə səfərdə ''Barselona''ya 3 qol vuran, amma 3:4 hesabı ilə uduzan ''Selta'' yenə asan təslim olmadı. Viqo təmsilçisi qalan müddətdə 2 qol vuraraq fərqi minimuma endirsə də, komandanın bundan artığına gücü çatmadı. Mbappe Madrid nəhəngində uyğun olaraq 35 və 36-cı qollarını vurdu. İndi onu İvan Samoranonun rekordunu təkrarlamaqdan cəmi 1 qol ayırır. ''Real''da ilk mövsümdə ən çox qol vuran futbolçuların siyahısına Samorano başçılıq edir. Sabiq çilili forvard 1992/93-də 37 qol vurmuşdi. La Liqada son 8 turda 7-ci qələbəsini qazanan ''Real'' ''Barsa'' ilə 4 xallıq fərqi qorudu.

Növbəti tur bizi ''El Klasiko'' gözləyir.