Misli premyer-liqasının 10-cu turunda “Qarabağ” “İmişli”ni məğlub etdi - 2:0.

Qurban Qurbanov oyunsonrası mətbuat konfransında jurnalistlərin suallarını cavabladı.

- “İmişli” rəhbərliyinə təşəkkür edirəm ki, oyunun yerinin dəyişdirilməsinə razılıq verdi. Vacib qələbə idi. İntizamlı komandaya qarşı oynadıq. Təhlükəli vəziyyətlər yaratdılar. Penalti də gördük qapımızda. Amma oyundan qopmadıq. İkinci hissədə daha yaxşı oynadıq və qələbə qazandıq. Oyundan-oyuna hər rəqibə qarşı ciddi hazırlaşmalıyıq. Futbolçuların məsuliyyəti artır.

- Əvəzetmələri bilərəkdən sona saxladız?
- Hər oyunçunun daha çox oynamağa ehtiyacı var. İstədim daha çox meydamda olsunlar. Təhlükəliydilər. Amma digər futbolçuların da meydanda olmasını istədim. Pis alınmadı. Elə rejimdə oynayırıq ki, eyni tempdə davam edə bilmərik. İllərdi belədi. Hər rəqib bizə qarşı fərqli oynayır. “İmişli” əvvəlki oyunlarda 5-4-1 taktiki sxemi ilə çıxmışdı. Bizə qarşı isə 5-3-2 ilə oynadılar. Biz belə hazırlaşmamışdıq.

- “Neftçi” Abubakarı alıb. Amma siz fərqli transferlər edirsiz, 2-ci liqadan oyunçu gətirirsiz. Ulduz futbolçu gətirmək fikriniz olub?
- Öncə onu deyim ki, xeyirli olsun. Samirin açıqlamasını gördüm. Deyir ki, 1-2 ay əvvəl gətirə bilməzdik. Bəzi situasiyalar var ki, onunla ayaqlaşmalıyıq. Hər komandanın fərqli strategiyası var. Sistemimizə uyğun olmalıdı. Hücum üçün biz heç də az məbləğ təklif etməmişik. Həmişə keyfiyyətli futbolçulara üstünlük vermişik.

- “Neftçi”dən çəkinmirsiz?
- Yox, əksinə, futbolçularım üçün motivasiya olacaq. Təki azarkeşlər sevinsin, ulduz futbolşular görsünlər.

- Nərimanın 75 dəqiqə oynamağa fiziki gücü var?
- Var. Oynaya bilər. Böyük oyunlarda 90 dəqiqə də oynaya bilər.

- Yerli çempionatda azarkeşlər olmur. Bu sizi üzmür?
- Oyunun bəzəyi azarkeşdi. Bu çempionatın səviyyəsini göstərir. Azarkeşlər çox önəmlidi. “Atletik”lə oyunda azarkeşlər 90 dəqiqə durmadan komandalarını dəstəklədilər. Bizim çempionatda da “Neftçi”, “Sabah”a qarşı oyunlarda 4-5 min azarkeş olur. Görürəm ki, futbolçular da sevinir.

- Kontenin “Çelsi”si daha təhlükəli idi, yoxsa Mareskanın?
- Fərq məşqçilərdədi, fərqli futbol sərgiləyirlər. 8 il əvvəlki futbolla bugünkü eyni deyil. Tələblər başqadı. Bu gün "Çelsi" daha yuxarı səviyyədədi, Kontenin "Napoli"si də yuxarı səviyyədədi. Futbol çox inkişaf edib. Dinamika var, güc çoxalıb. Buna da hamı uyğunlaşır. Onlar o çempionatlarda qarşılığını görürlər, bizdə fərqlidi. Biz də oralara yaxınlaşmaq istəyirik. 8 il əvvəlki "Qarabağ"dan daha yaxşıyıq, təcrübəmiz artıb. Biz bir qədər inkişaf etmişiksə, onlar lap çox inkişaf edib (gülür).

MÜZƏFFƏR QULUZADƏ