"Qarabağ" Azərbaycan premyer-liqasının 34-cü turunda səfərdə "Zirə"ni 1:0 hesabı ilə məğlub edib.

“Football-plus.az” xəbər verir ki, Ağdam təmsilçisinin baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavablandırıb:

- Juninyo "Bayer-04”lə oyundan sonra sanki o qədər də hərəkətli görünmür. Bunu təkliflərlə əlaqələndirirsiz?

- Hərəkətində geriləmə var. Məşqçi olaraq bunu başa düşürəm. Həm dediyiniz fikirlər, həm də oyunlara motivasiya etmək asan deyil. Nə qədər futbolçuları motivasiya etsək də, onlar özləri də özlərini motivasiya etməyi bacarmalıdırlar. Görünür tam istədiyim kimi alınmır. Bəlkə də, komandaya tam uyğunlaşmayıb. Bizim rejimdə, məşq proseslərimizdə, hər oyuna yanaşmağımızda, ola bilər tam dərk edə bilməyib. İnanın ki, hər şey yaxşıplığa doğru gedir. Özü ilə də söhbətimiz olub. Gələn il daha yaxşı Juninyo görmək istəyirik. İnanıram ki, onunla ilə birlikdə bacaracağıq ki, istədiyimiz Juninyo hər oyunda olsun.

- Mövsümü bağlayan zədəli futbolçu var?

- Gedişata baxacağıq. Marko Veşoviçdə daha ciddi görünür. Yassin Benziada gedişata baxacağıq. Həkimlər 10-12 gün deyiblər, amma hər bir halda, əzələ məsələsidi. Əzələ elədi ki, tələssən, problem yarana bilər. Ayın 26-da oyuna hazır olmaq ehtimalı var. Amma 100 faiz hazır olmasa, risk etməyəcəyik. Çünki böyük ehtimalla milliyə dəvət edəcəklər.

- Müqaviləsi bitən oyunçularla danışıqlar başlamısız?

- Vaxtımız var. Yüngül danışıqlara başlamışıq. Hər bir halda, mövsümün sonunda bilinəcək.

- Komandaya gətirmək istədiyiniz oyunçularla danışıqlar var?

- Danışıqlar var. Amma yekunlaşdırılan yoxdu.

- "Qarabağ" Kadi, Mahiri, Musanı geri qaytarır?

- Heç biri ilə hələ danışığımız yoxdu.

- Avrokuboklar uğrunda 4 komanda mübarizə aparır. Sizcə, hansı daha şanslıdı?

- Hər birinin şansı eynidi. Maraqlı sonluq olacaq. Hər birinə uğurlar arzulayıram.