Məlum olduğu kimi ''Yuventus''da İqor Tudor dönəmi başa çatdı. 8 oyunluq qələbəsiz seriyadan sonra xorvatiyalı mütəxəssislə yollar ayrıldı.

"Football-plus.az" xəbər verir ki, yeni məşqçi böyük ehtimalla Luçano Spalletti olacaq.

Təcrübəli çalışdırıcı Turin nəhənginin təklifini qəbul edib. Bu arada Spallettinin təyinatı rəsmi olaraq açıqlandıqdan sonra ''Yuventus'' eyni anda 3 məşqçiyə pul ödəyən bir kluba çevriləcək. Çünki ''qoca sinyora'' Tudor və ondan öncəki məşqçi Tyaqo Mottaya da təzminat ödəməkdə davam edəcək. Hər iki məşqçinin də klubla müqaviləsi 2027-nin yayına qədər nəzərdə tutulmuşdu. ''Yuve''nin bu ilin iyununda açıqlanan maliyyə raportunda Motta və köməkçilərinə ümumilikdə 16,3 milyon avro ödəniləcəyi qeyd olunmuşdu.

Bu məbləğ 2026/27-nin sonuna qədər olan dönəmə aiddi. Tudorun isə maaşı ilə bağlı klubdan rəsmi açıqlama verilməmişdi. Amma ''Yuve''yə yaxın qaynaqların iddiasına görə bu məşqçiyə müqavilə müddətinin sonuna qədər köməkçiləri ilə birlikdə 11 milyon avro ödənilməlidi. Yəni ''Yuventus'' bu iki mütəxəssisə hələ təxminən ilyarım müddətində 27,3 milyon avro təzminat ödəyəcək.