Tyaqo Mottanın aqibəti müəyyənləşib. O, tezliklə “Bolonya”dan ayrılacaq.

Baş məşqçi İtaliya klubu ilə yollarını ayırmağı lazım bilib. Bu barədə “Bolonya”nın saytı məlumat yayıb. 41 yaşlı mütəxəssis müddəti mövsümün sonunda başa çatacaq müqaviləsini yeniləməmək qərarına gəlib. Klub rəsmi açıqlamasında məşqçiyə uğurlar arzulayıb.

Tyaqo Motta “Bolonya”ya 2022-ci ilin sentyabrından başçılıq edir. Komanda bu mövsüm A seriyasında çox yaxşı çıxış edərək Çempionlar Liqasında oynamaq hüququ qazanıb.
Mottanın adı son vaxtlar “Yuventus”la birgə hallanır. Artıq onun Turin klubuna baş məşqçi təyin olunacağı haqda məlumat yayılıb.

Qeyri-rəsmi mənbələr İtaliya yığmasının sabiq yarımmüdafiəçisinin ölkə nəhəngi ilə 3 milyon avro illik maaşı nəzərdə tutan 3 il müddətinə müqavilə bağlayacağını xəbər verib.