''Fənərbaxça''nın ulduzu Anderson Talişka haqqında çıxan şayiələrə reaksiya bildirib. O, klubdan ayrılmaq istəməsi ilə bağlı yayılan iddiaları təkzib edərək ''X'' hesabından ''saxta xəbərlər başladı'' paylaşımını edib.

Öncəki gün ESPN Talişkanın Türkiyədə xoşbəxt olmadığı və vətəni Braziliyaya qayıtmaq istədiyi haqda xəbər dərc etmişdi. Bundan başqa xəbərdə Talişkanın Joze Mourinyonun ''Fənər''dən ayrılmasından da kəskin narazı qaldığı qeyd olunmuşdu. Çünki təcrübəli futbolçu İstanbul nəhənginə məhz bu məşqçinin dönəmində transfer edilmişdi.

Daha öncə Türkiyədə ''Beşiktaş''da da forma geymiş 31 yaşlı futbolçu ''Fənər''ə bu ilin yanvarında gəlib. Onun ''sarı-lacivərdlilər''lə müqaviləsi bu mövsümün sonunda başa çatır.

Talişka indiyə qədər bu klubda 36 rəsmi oyunda iştirak edərək 16 qol, 3 məhsuldar ötürməlik performans sərgiləyib.