Çağdaş Atan karyerasının heç də ən yaxşı dönəmini yaşamır.

"Football-plus.az" xəbər verir ki, ötən ay bu mütəxəssis “İstanbul BŞ”dən ayrılmalı olmuşdu. İndi də Atan Türkiyə Futbol Federasiyasının nəzdində fəaliyyət göstərən Mübahisəli Məsələlərin Həlli üzrə Komitədən (MMHK) bəd xəbər alıb.

Komitə “Kayserispor”un xeyrinə qərar verib. Məsələ burasındadı ki, Çağdaş 2023-ün sentyabrında qalmaqallı şəkildə “Kayserispor”dan ayrılaraq başakşəhərlilərin başına keçmişdi. Həmin vaxt onun kayserililərlə müqaviləsinin müddəti davam edirdi. Bu üzdən “sarı-qırmızılar” MMHK-ya müracit etmişdilər. Təxminən iki ildən sonra komitə 45 yaşlı çalışdırıcının Kayseri klubuna 12 milyon lirə (486 min manat) ödəməli olduğuna qərar verib. Əsas borc 8 milyon lirədi. Amma faizlərlə birlikdə məbləğ 12 milyon lirəyə çatır. Qeyd edək ki, Atan hazırda işsizdi.

Bu arada Türkiyə futbolunda işləyən daha bir məşqçidən xəbər var. Söhbət superliqanın debütantı “Fatih Karagümrük”ü çalışdıran Marsel Liçkadan gedir. 48 yaşlı çexiyalı mütəxəssisin Sarıyerdə yerləşən evi qarət olunub.

“Ekol TV”nin paylaşdığı xəbərə görə evdən 1800 dollar pul, eləcə də 8 min avro dəyərində qızıl və brilyant oğurlanıb. Liçka evinə gələrək oğurluqdan xəbər tutan kimi dərhal bu barədə polisə məlumat verib. Polis artıq araşdırmaya başlayıb.

Maraqlıdı ki, evdə heç bir dağınıqlıq aşkarlanmayıb. Eləcə də qapı sındırılmayıb. Ona görə də bütün şübhələr evin xadiməsinə yönəlib. Elə Liçka da verdiyi ifadədə xadimədən şübhələndiyini vurğulayıb. Polislər barmaq izlərini götürərək evin yaxınlığındakı təhlükəsizlik kameralarını incələyiblər.

Türkiyədə belə oğurluq halları çox nadir hallarda baş verdiyindən hadisə futbol ictimaiyyətində böyük təəccüb və təəssüf doğurub.