''Qalatasaray''da dünən bir çox ödəmələr həyata keçirildi.

“Football-plus.az” xəbər verir ki, bunların arasında Domenek Torrentə olan borc da var. Bilindiyi kimi Torrent 2021/22-nin gedişində Fatih Terim qovulduqdan sonra onun əvəzinə baş məşqçi postuna gətirilmişdi. 1,5 illik müqaviləyə imza atan, amma yarım il işlədikdən sonra yeni rəhbərliyin gəlməsinin ardından qovulan kataloniyalı mütəxəssis İstanbul nəhəngindən şikayət etmişdi. FİFA onun şikayətinin haqlı olduğuna qərar verərək ''Qalatasaray''ın faizlərlə birlikdə Torrentə 2,8 milyon avro ödəməli olduğunu açıqlamışdı. Bu məbləğ dünən Torrentin hesabına köçürülüb! Bundan başqa klub işçilərinin hər birinə 10 min lirə (təxminən 657 manat) ödənilib. Ümumilikdə təxminən 17 milyon avroluq ödəmələr həyata keçirilib. Bura oyunçuların məvacibləri, bəzi transferlərdən qalan məbləğlər, işçilərin və Torrentə verilən pullar daxildi. Amma ''Aslan'' iyulun 1-nə qədər Omar Elabdellauinin də borcunu ödəməlidi. Norveçli futbolçu da eynilə Torrent kimi təzminat məsələsini FİFA-ya daşımış və 2,8 milyon avro almağa haqq qazanmışdı.