Sane parladı, ''Qalatasaray'' sevimli rəqibini məğlub etdi

''Qalatasaray'' Türkiyə çempionatının 9-cu turunda ''İstanbul BŞ''nin qonağı oldu.

"Football-plus.az" xəbər verir ki, Okan Buruk qarşıdan gələn Çempionlar Liqası matçını düşünərək Viktor Osimhen ilə Yunus Akgünü ehtiyatda saxlamışdı. Davinson Sançes isə cəza üzündən oyunu buraxırdı. Buna baxmayaraq ''Cim-Bom'' fanatlarını sevindirdi.

Gəldiyi gündən bəri çox tənqid olunan Leroy Sane nəhayət, özünü yaxşı tərəfdən göstərməyi bacardı. ''Sarı-qırmızılar'' almaniyalı ulduzun qolları sayəsində 2:1 qalib gəldi.

Türkiyə karyerasında ilk dəfə dubl edən Sanenin səfərdə sonuncu dəfə iki qol vurmasına 2023-ün avqustunda rast gəlinmişdi. Həmin vaxt o, ''Bavariya''nın heyətində bundesliqa çərçivəsində ''Verder''lə səfər oyununda bu uğuru yaşamışdı. İstanbul nəhəngi 9 turdan sonra xalını 25-ə yüksəldərək inamla liderliyini davam etdirdi.

''Qalatasaray''ın Türkiyə çempionatı çərçivəsində məğlubiyyətsiz seriyası 17, səfərdəki qələbə seriyası isə 9 oyuna yüksəldi. Okan Burukun sabiq komandası olan ''İstanbul BŞ'' onun ''Qalatasaray''ı üçün ən rahat rəqiblərdən biridi. Belə ki, ''Cim-Bom'' bu məşqçinin başçılığı altında başakşəhərlilərə qarşı keçirdiyi 7 superliqa matçının hamısından qalib ayrılıb.

Turnirin tarixində ''İstanbul BŞ''ni ardıcıl 7 oyunda məğlub edən kollektiv olmamışdı.