Türkiyə çempionatında 8-ci turdan sonra məşqçisi ilə yollarını ayıran 3 klubdan ikisində baş tutan təyinatlar barədə məlumat vermişdik.

“Kayserispor” Radomir Caloviç, “Antalyaspor” Erol Bulut ilə anlaşmışdı. “Eyüpspor” isə yeni məşqçisini yalnız dünən açıqlayıb. İstanbul təmsilçisi Səlcuk Şahini Orhan Akla əvəzləmək qərarına gəlib.

Klubdan verilən rəsmi açıqlamada 46 yaşlı mütəxəssislə üçillik müqavilə imzalandığı qeyd olunub. Futbolçu kimi 4 il (2003-07) “Qalatasaray”da top qovmuş Orhan Ak məşqçi karyerasının əvvəllərində Abdulla Avcının köməkçisi kimi fəaliyyət göstərib. 2023-24-cü illərdə isə o, əvvəlcə “Ankaragücü”, daha sonra “İstanbul BŞ”də Əmrə Belözoğlunun köməkçisi olub. Müstəqil məşqçi kimi o indiyə qədər yalnız “Fatih Karagümrük”də çalışıb.

İstanbul klubu bu ilin yanvarında 1-ci liqada oynayarkən Akla anlaşmış və apreldə uğursuz nəticələr üzündən onunla vidalaşmışdı. Onsuz da çox çətin durumda olan, superliqanın son 5 turunda nəinki xala, hətta qola da həsrət qalan “Eyüpspor”un belə təcrübəsiz məşqçi ilə üçillik müqavilə imzalaması bir qədər təəccüb doğurur.