Superliqanın iki təmsilçisi yeni baş məşqçisinə qovuşub.

“Football-plus.az” xəbər verir ki, söhbət İstanbul klublarından – “İstanbulspor”la “Pendikspor”dan gedir. Məlum olduğu kimi, “İstanbulspor” ilk 4 oyunda qələbəyə həsrət qalandan sonra Fatih Təkkə ilə yollarını ayırmışdı. Bu kollektivi mövsümün qalan hissəsində Hakan Yakın çalışdıracaq. Türkəsilli isveçrəli mütəxəssislə 2 illik anlaşma əldə olunub. Bu təyinatı gözləmək olardı. Çünki Hakan Yakın oktyabrın 8-də “İstanbulspor”un səfərdə “Beşiktaş”a qarşı keçirdiyi oyunu tribunadan izləmişdi. 46 yaşlı Yakının müstəqil məşqçi kimi təcrübəsi elə də çox deyil. Buna qədər o, İsveçrədə “Sankt Qallen”in akademiyasında çalışıb, eləcə də “Qrasshoppers” və “Şaffhauzen”də qardaşı Murat Yakının köməkçisi kimi işləyib. Müstəqil məşqçi kimi isə ötən mövsüm “Şaffhauzen”in başında olub. Futbolçu kimi daha böyük populyarlıq qazanan, İsveçrə, Fransa, Almaniya klublarında top qovan Hakan Yakın 2004/05-in 2-ci dövrəsində qısa müddət “Qalatasaray”ın da şərəfini qoruyub.

Ötən tur evdə “Sivasspor”a uduzandan sonra Osman Özköylü ilə yollarını ayıran “Pendikspor” da əcnəbi məşqçiyə üstünlük verib. Belə ki, debütant portuqaliyalı İvo Vieyra ilə mövsümün sonuna qədər müqavilə imzalayıb. 47 yaşlı mütəxəssis daha öncə “Nasyonal”, “Maritimu”, “Aveş”, “Akademika”, “Eştoril”, “Moreyrense”, “Gimanrayanş”, “Əl-Vəhdə”, “Famalikan”, “Jil Visente” kimi klubları çalışdırıb. Onun son iş yeri Braziliyada olub. “Kuyaba”nı çalışdıran Vieyra bu klubla 24 oyundan 16 qələbə, 3 bərabərlik, 5 məğlubiyyətlə ayrılıb. Həm “Pendikspor”un, həm də “İstanbulspor”un hələ də qələbəyə həsrət qaldığnı bildirək. Həftə sonu “Pendikspor” Konyaya yollanacaqsa, “İstanbulspor” “Ankaragücü”nü qəbul edəcək.

Onu da bildirək ki, “Ankaragücü”nün başında yer alan Əmrə Belözoğlu üçün qarşıdakı oyun məşqçi karyerasının yubiley – 100-cü rəsmi matçı olacaq. Buna qədər “Fənərbaxça” və “​İstanbul BŞ”ni çalışdıran 43 yaşlı mütəxəssis indiyə qədər 99 qarşılaşmanın 77-də məğlub olmayıb. Belə ki, onun komandaları bu 99 oyundan 52 qələbə, 25 heç-heçə, 22 məğlubiyyətlə ayrılıb. Bu qələbələrdən 7-si “Fənər”in, 44-ü “İstanbul BŞ”nin və 1-i “Ankaragücü”nün başında əldə olunub.