Türkiyə çempionatında məşqçi istefalarının sayı heyrət doğurmaya bilməz.

"Football-plus.az" xəbər verir ki, 8-ci tur birdən-birə üç məşqçinin istefası ilə nəticələndi. Əvvəlcə “Eyüpspor”da Səcuk Şahin, daha sonra “Kayserispor”da Markus Gisdol və son olaraq çərşənbə günü “Antalyaspor”da Əmrə Belözoğlu dönəmi başa çatdı. Bununla da cari mövsümdə 8 turu arxada qalan superliqada istefaların sayı 7-yə yüksəldi! İlk həftələrdə “Qaziantep” İsmət Taşdəmirlə, “Beşiktaş” Ole Qunnar Sulşerlə, “Fənərbaxça” Joze Mourinyoyla, “İstanbul BŞ” isə Çağdaş Atanla yolları ayırmışdı. Digər çempionatlar, xüsusilə “böyük beşlik” ilə müqayisə etdikdə ortaya çox dəhşətli mənzərə çıxır. Bu mövsüm indiyə qədər premyer-liqada 2, bundesliqada 2 və La Liqada 1 istefa gerçəkləşib. Yəni təkcə qardaş ölkənin birinciliyində ümumilikdə bu üç turnirdəkindən daha çox istefa reallaşıb!

Liqa-1 ilə A seriyasında, ümumiyyətlə, bu mövsüm istefa baş tutmayıb. Elə Avropanın digər ölkələrində də bu mövzuda vəziyyət Türkiyədəki qədər acınacaqlı deyil. Məşqçi istefaları baxımından digər pillələrdə Yunanıstan (5), Rusiya, Portuqaliya (hər ikisi 3), Avstriya, Belçika və Niderland (hamısı 2) qərarlaşıb.

Bu arada istefaların baş tutduğu klublarda yeni təyinatlar reallaşmaq üzərdi. “Kayserispor” Radomir Caloviçlə anlaşıb. 42 yaşlı monteneqrolu mütəxəssis Kayseri klubunun “1+1” illik təklifini qəbul edib. Caloviç ötən mövsüm “Riyeka” ilə tarix yazaraq həm Xorvatiya çempionluğunu, həm də ölkə kubokunu qazanmışdı. Bu, “Riyeka” tarixinin cəmi 2-ci çempionluğu idi. Ancaq komanda bu mövsümə çox bərbad start verdiyindən Caloviç cəmi 3 turdan sonra, sentyabrın əvvəlində istefaya göndərildi. Yeri gəlmişkən, Kayseri bu futbol adamı üçün yad məkan deyil. O, futbolçu kimi 2006/07 mövsümündə bu şəhəri təmsil edən “Ərciyəsspor”da çıxış edib. Caloviç “Eyüpspor”dan da təklif almışdı.

Bu klubdan söz düşmüşkən, İstanbul təmsilçisi hələ yeni məşqçisini seçməyib. Klub Orhan Ak, Əmrə Belözoğlu, hətta George Haci ilə danışıq aparır. İsmayıl Kartaldan “yox” cavabı alan “Antalyaspor” isə üstünlüyü Erol Buluta verib. Daha öncə “Yeni Malatyaspor”, “Alanyaspor”, “Fənərbaxça”, “Qaziantep” və sonuncu dəfə çempionşip təmsilçisi “Kardiff Siti”ni çalışdırmış 50 yaşlı Bulutla ikiillik müqavilə imzalanıb.