Son 3 turda 7 xal toplayan və Sərgən Yalçın ilə yenidən yüksəlişə keçmək istəyən ''Beşiktaş''da diqqətçəkən bir qərar qəbul edilib.

Belə ki, rəhbərlik və məşqçilər korpusunun birlikdə qəbul etdiyi qərara əsasən komandanın kapitanları dəyişib. Buna qədər birinci kapitan Nəcip Uysal, ikinci kapitan isə qapıçı Mərt Günok idi. Amma sarğı bu yay transfer olunan isimlərə verilib. Bundan sonra birinci kapitan statusunu Orkun Kökçü, ikinci kapitan statusunu isə Uilfrid Ndidi yerinə yetirəcək. Rəsmi açıqlamada qeyd olunub ki, məşqçilər korpusu meydanda daha aktiv rol oynaya biləcək futbolçuların kapitanlığa gətirilməsini istəyib.

Eyni zamanda Nəcip Uysal və Mərt Günoka kapitanlıq dönəmindəki fəaliyyətlərinə görə təşəkkür bildirilib. Əslində bu dəyişikliyi sürpriz adlandırmaq çətindi. Nəcip Uysal hər nə qədər bütün karyerasını ''Beşiktaş''a həsr etsə də, əsas heyət üzvü sayılmır. Üstəlik təcrübəli futbolçu təxminən son 1 ili zədə üzündən boşa vermiş və yalnız ötən ay sıraya dönmüşdü.

Mərt Günok isə həm Türkiyə yığmasında əsas qapıçı statusunu itirib, həm də mövsümə çox inamsız start verib. O, bu mövsüm iştirak etdiyi 12 rəsmi oyunun yalnız 1-də qapısını toxunulmaz saxlayıb. Hətta Mərtin əsas heyətdəki yeri də şübhə doğurmaya başlayıb. Ancaq iddialara görə Sərgən Yalçın ona əsas heyətdə yer verməkdə davam edəcək.