“Beşiktaş”da son dönəmlərdə nəticələr düzəlsə də, komanda əsas bəlasından – qol buraxmaq xəstəliyindən qurtula bilmir. İstanbul nəhəngi bu mövsüm keçirdiyi 13 qarşılaşmanın 12-də qapısını toxunulmaz saxlaya bilməyib!

Bu 13 oyunun 12-də qapını Mərt Günok, 1-də Ərsin Destanoğlu qoruyub. Türkiyə yığmasında əsas qapıçı statusunu son dönəmlərdə Uğurcan Çakıra verməli olan Mərtin bu mövsümdəki performansı fanatlar arasında birmənalı qarşılanmır. O, 12 qarşılaşmanın cəmi 1-də - “Kayserispor”la səfər oyununda (4:0) qapısını toxunulmaz saxlayıb.

Elə sonuncu dəfə “Qalatasaray”la səfər derbisində (1:1) “Beşiktaş” müdafiədə kobud səhvə yol verərək qol buraxdı. Həmin epizodda topu Uilfrid Ndidi itirsə də, məhz Mərt tənqid obyektinə çevrilmişdi. Çoxlarının fikrincə, o, topu heç də uyğun mövqedə olmayan Ndidiyə ötürməməliydi. Ndidi bu ötürməni gözləmədiyinə görə topu normal şəkildə qəbul edə bilməmişdi. Amma formada olmamasına və çoxsaylı tənqidlər üzündən psixoloji cəhətdən çətin dönəmdən keçməsinə baxmayaraq, Sərgən Yalçın əsas qapıçısına güvənməkdə davam edəcək. Türkiyə mətbuatının yazdığına inansaq, təcrübəli mütəxəssis üçün hələ ki qapıçı dəyişikliyi gündəmdə deyil. Növbəti turda - “Gənclərbirliyi” ilə ev oyununda da qapını məhz Mərt qoruyacaq. Ancaq ölkə kubokunda Ərsin Destanoğlu şans qazanacaq. 2021-ci ildən “Beşiktaş”ın şərəfini qoruyan 36 yaşlı Mərt Günok indiyə qədər bu klubda 129 rəsmi oyunda forma geyib. O, ümumilikdə 15 qol buraxıb və 38 görüşdə qapısını toxunulmaz saxlayıb.

Yeri gəlmişkən, derbidə zədələnən və Mali yığmasının düşərgəsinə də yolanmayan Əl-Bilal Turenin son durumuna aydınlıq gəlib. Onun sol ayaq arxa əzələsində problem aşkarlanıb. Futbolçunun müalicəsinə başlanılıb. Onun təxminən 3 həftəliyə sıradan çıxdığı bildirilir. Bu yay transfer edilən 24 yaşlı forvard bu mövsüm 5 oyunda iştirak edərək hesabına 1 qol yazıb.