Türkiyə çempionatında inamla turnir cədvəlinə başçılıq edən ''Qalatasaray''la bağlı sürpriz transfer iddiası ortaya atılıb.

Türkiyə mətbuatının yazdığına inansaq, Okan Buruk rəhbərlikdən mərkəz yarımmüdafiəçisi və oyun qurucusu kimi oynaya bilən futbolçunun alınmasını istəyib. Bu üzdən ''Cim-Bom'' diqqətini ''Krasnodar'' və Ermənistan yığmasının kapitanı Eduard Spertsyana yönəldib.

Əslində bu, yəni xəbər deyil. Bir neçə ay öncə də ''sarı-qırmızılar''ın erməni futbolçuya maraq göstərdiyi bildirilmişdi. İyunun əvvəllərində Rusiya mətbuatında Spertsyanın sözləri manşetə çıxmış və o, özü üçün Türkiyədə oynamağın mümkün olmadığını bildirmişdi. Spertsyan Murad Musayevin çalışdırdığı ''Krasnodar'' ilə əsas hədəfinə çataraq Rusiya çempionu olub. Bu üzdən o artıq gücünü Avropada sınamaq istəyir.

Yay transfer dönəminin sonlarına yaxın ona ''Sauthempton'', ''Seltik'', ''Jirona'', ''Sevilya'' maraq göstərmişdi. İngilislər hətta 18 milyon avroluq rəsmi təklif də irəli sürmüşdülər. Amma bu transfer son anda baş tutmadı.

Spertsyanı digər klublar üçün cəlbedici edən daha bir məqam onun müqavilə müddətinin mövsümün sonunda başa çatmasıdı. Avropada oynamaq istədiyi üçün yeni müqaviləyə imza atmayan 25 yaşlı futbolçu yanvardan etibarən istədiyi klubla danışıqlar apara biləcək. ''Krasnodar'' dəyəri 25 milyon avro olan futbolçusunun satışından müəyyən məbləğ qazanmaq istəyir. Ona görə də onun satışının yanvarda baş tutma ehtimalı yüksəkdi. Amma digər tərəfdən erməni futbolçunun Türkiyədə və xüsusilə də ''Qalatasaray'' kimi bir klubda peyda olması təbii ki, söz-söhbətlərə səbəb olacaq.

Hələlik Türkiyə çempionunun bu futbolçuya marağının nə dərəcədə ciddi olduğu dəqiq bəlli deyil. Amma necə deyərlər, od olmayan yerdən tüstü çıxmaz. İddialara görə baş məşqçi Okan Buruk Spertsyanın oyununu çox bəyənir.

''Krasnodar''ın öz yetirməsi olan və indiyə qədər heç bir başqa klubda forma geyməyə yarımmüdafiəçisi 159 rəsmi oyunda 42 qol, 49 rəsmi ötürmə ilə fərqlənib. Bu mövsüm 11 oyunda onun aktivində 4 qol, 10 məhsuldar ötürmə var.